翠翠同老公一齊「走佬」 謝安琪模擬作動路線襯定母女裝
多位女藝人上半年排住隊生雞B，踏入倒數階段，謝安琪（Kay）及葉翠翠兩位大肚婆各有準備。本月底就生的Kay心情淡定，笑謂期待入院歎世界，更已為B女襯定母女裝出院！而主張順產的她表示突然作動的話，已計劃好快速路線入院生B！至於新手準媽媽葉翠翠亦已執定走佬袋，預埋老公周曉東齊齊住院！
去年不少女藝人相繼宣布有喜，距離預產期愈來愈近，現時肚大如籮的謝安琪（Kay）、葉翠翠亦已做足準備，隨時ready迎接小生命的降臨！佗B女的Kay預產期為三月底，已有一子的她生B經驗十足，現時表現淡定。計劃順產生B的她，昨日接受本報電話訪問時，表示若突然在街上作動，已諗定路線快速入院：「我會去醫院等醫生睇我情況，如果有時間就沖個涼、喺醫院hea吓。」她透露上胎是在家中作動，由老公張繼聰負責揸車載她到醫院，事前更曾模擬過去醫院的路線：「其實平時都知點行，但上胎因為第一次生，所以有模擬過個心情要點行，但依家佢又大個仔，我又生過一次，唔使啦。」
設備充足似酒店
Kay又表示已執定走佬袋並放在當眼位置，內裏衣物以簡單、輕便為主：「我上次都淨係帶套睡衣，護膚品嗰啲都好少，因為生B都唔會在乎自己有冇打扮。同埋陪月姨姨同屋企人一定會帶湯水畀我，幫我可以快啲餵到母乳同恢復元氣。」又指醫院設備充足，專為孕婦而設的護理用品及坐月用品亦非常齊全，笑言入院生B似去住酒店：「間醫院嘅裝修都好清雅，真係好似酒店咁，所以我都幾期待，除咗見囡囡之外，嗰幾日好似幾歎咁！」細心的Kay更為產後出院一刻做好準備，已襯定母女裝，屆時可以與囡囡一齊着靚靚出院。
緊張大師剪臍帶
至於預產期為五月中的葉翠翠，雖是新手準媽咪，但她昨日接受本報電話訪問時，就坦言未覺緊張，笑謂執走佬袋時會預埋老公周曉東一份：「執埋老公嗰份，到時佢一齊住院，老公都有話『使唔使呀？』我話『你唔陪我，我走咗去呀！』」問到老公可會入產房剪臍帶？她說：「我覺得好核突，老公就想剪，不過佢係緊張大師，又要影相又要拍片，睇佢到時做得邊樣啦。」又透露計劃開刀生B：「聽過媽媽朋友講自然生產有好處，但都有好多驚險事，自己又好細膽，所以都係開刀生。（唔怕有疤？）唔怕，好細條o架咋，比堅尼都着到。」
此外，翠翠早前與老公影了一輯大肚靚相，以Bra Top配薄紗性感上陣的她，坦言老公曾投訴太性感：「老公有話唔得咁性感，性感嘅由佢自己嚟拍。之前仲專登買咗幾套內衣影相，老公見到即問咩事，知道係拎嚟影相，佢就話『影你個頭呀！』」最後她選擇尊重老公，所以在拍攝時亦較為密實一點。
文：音樂組
採：影視組、音樂組
攝影化妝：Jerman Cheung and Jessica Yeung＠J.A.C.K.Timeles makeup & photography FACTORY
|
鍾意就快D Share啦！
|
|
|
