今日喺鄺文珣(May)嘅42歲生日，佢突然喺微博宣佈咗一件重大喜訊，留言﹕「今天生日跟大家分享我的喜悅，我有個很小型的大禮物！介紹這個小麵粉給你們認識吧。(BB emoji)hello(揮揮手)」相中見鄺文珣穿上一件粉紅色嘅露腰裝，腹部已明顯隆起，佢用雙手托住個肚，低頭微微一笑，感覺好幸福溫馨！鄺文珣初出道時被指貌似劉嘉玲，喺《真情》年代，溫婉女生Joan仍令人印象深刻。不過文珣喺06年下嫁製衣商人應德榮（Andrew）後，淡出娛樂圈，現已成為兩子之母，分別係8歲大仔家澄同6歲細仔家泊。文珣曾自爆老公曾患上抑鬱躁狂，受過長達5年嘅煉獄生活，終日以淚洗面，幸好兩夫妻都有宗教信仰，花咗兩年時間重修舊好，如今再添一位新成員，屋企當然會更加熱鬧。今日《蘋果》致電文珣送上祝福，文珣話知道有BB後好開心，預產期係今年10月，佢話﹕「瘦咗好多，好彩冇嘔，但都辛苦，同之前陀唔同，口味轉咗。以前最鍾意食日本嘢，o依家諗起都想嘔，以前最唔鍾意食白汁，但o依家就好鍾意。」係咪最想生女？文珣話﹕「承你貴言啦，我有兩個仔，有女都好。」鄺文珣話預計今胎個肚都會好大，因為現在3個月已明顯見肚，而之前兩胎更到好似生孖胎一樣，佢話會定時貼相出嚟，同大家一齊分享喜悅。
| 鄺文珣喺微博宣佈再度有喜。 | | |
| | | |
來源 source: http://s.nextmedia.com
|
鍾意就快D Share啦！
|
|
|
