35歲索媽葉翠翠日前喺養和醫院誕下7磅半重嘅囝囝，今日佢同囝囝由老公周曉東（Raymond）陪同下出院。大約下午兩點，翠翠着咗件乾濕褸，包到冚現身，Raymond則緊貼其後，一邊單手抱住囝囝一邊講電話，合照時，Raymond兩度親吻翠翠，為免囝囝受閃光燈影響，所以佢哋起初都不願囝囝上鏡，後來記者示意唔用閃光燈，翠翠才肯一家三口合照，而囝囝樣子十分可愛。及後翠翠受訪時，Raymond抱住囝囝先上七人車，一副冧樣坐喺車上不停甜笑。問到囝囝改咗中文名未？翠翠話：「未改，但乳名叫『小東東』，Raymond Junior，乜都要跟晒我老公。」翠翠指現時雖然有餵哺母乳，但小東東都有食奶粉，佢笑住話：「老公當咗BB係佢，餵奶粉嘅時候，佢話我唔識等佢餵，所以我未試過餵奶樽同掃風，有時BB喊，老公又好開心，因為拍兩下BB就唔喊靜咗，如果半夜喊，睇佢仲會唔會咁開心，加上佢話BB好似佢，所以更加鍾意。」翠翠指陪月要待一星期後先可以幫手湊BB，問到老爺奶奶見咗孫仔未？翠翠表示：「未呀，佢哋喺上海，因為BB早咗出世。」翠翠笑指BB提早出世，所有費用都浪費咗，佢話：「本身book咗普通單人房，但佢早咗出世，變咗要住頭等單人房，醫院費用要加碼，原本搵咗師傅擇時辰，嗰啲錢又嘥咗，所以再生的話，自己真係要計清楚，唔好再擺烏龍。」咁即係想再追多個？翠翠直言等到小東東1歲，想追多個女，佢笑住話：「我有個港姐后冠，如果畀個女，佢會keep住，如果畀個仔，佢會畀老婆。」老公有咩獎勵佢？翠翠話：「應該問佢，如果佢肯做晒夜間保母就得喇，已經好好，實質嘅嘢唔使喇。」有好多人話小朋友拎出世紙後就要搵學校，不過翠翠就話：「之前叫咗老公安排，但佢話唔使咁急，所以我交畀佢搞。」翠翠仲表示未知會唔會為小東東搞百日宴。
| 攝影：仇志德 | | |
| | | |
|
鍾意就快D Share啦！
|
|
|
