C朗又做救世主，於巴拿貝大演帽子戲法，幾經艱苦淘汰拜仁打入4強！首回合作客贏2:1，返主場又有C朗入波以為應付唔難，點知沙治奧拉莫斯擺老烏累輸波，比賽要進入加時。因為維達爾領紅，皇馬打多個下C朗於加時階段入多2粒，加上馬高阿辛斯奧埋齋，兩回合計皇馬贏6:3，其中5球都係C朗入，真係勁到得人驚！
今場教練安察洛堤出齊羅拔利雲度夫斯基、洛賓同列貝利攻堅，希望盡早開紀錄。球隊開波後的確係威係城，13分鐘，羅拔回後禁區頂，維達爾一抽僅僅高出，16分鐘，洛賓幾乎單刀，但基羅拿華斯快一步解圍。皇馬頂得住開波初段，之後就大舉反擊，仲勁有威脅，丹尼爾卡華積禁區外射個冷箭，紐亞飛身撲出，跟手28分鐘，紐亞撲出對手勁射，個波溜到禁區頂，沙治奧拉莫斯空晒勁射睇怕入硬，點知畀保定救到空門，半場窿窿入更衣室。
拜仁換邊後狂攻，49分鐘洛賓於禁區內笠射，畀馬些路護到空門，但2分鐘後佢殺入禁區，畀卡斯米路踢跌，球證直指12碼點，羅拔仔主射一針見血，領先1:0。之後洛賓右路搞搞震CHIP入禁區，維達爾趕到一射竟然連龍都唔中，列貝利跟手禁區車身凌空一抽，但畀基羅拿華斯接實。76分鐘皇馬入波，卡斯米路右路斬個靚波入禁區，C朗走個靚位一頂入網，追成1:1平手。但2分鐘後皇馬無啦啦又失波，羅拔仔於禁區被重重包圍，本身已甩咗個波，點知沙治奧拉莫斯一撈竟然撈咗個波入網，拜仁又試領先。84分鐘拜仁中場維達爾攞第二面黃牌離場，拜仁十個打十一個，皇馬狂攻但始終入唔到波，90分鐘拜仁贏2:1，兩回合計打和3:3，要進入加時。
去到加時上半場，C朗於禁區空晒控低個波之後怒射入網，追成2:2平手，但睇慢鏡佢明顯處於越位位置，拜仁失波堅冤枉。加時下半場馬些路單騎殺入禁區，再傳畀C朗搞掂反先3:2，加上馬高阿辛斯奧射成4:2，皇馬兩回合贏6:3殺入4強。
延伸閱讀：
【歐聯 C朗越位維達爾領紅 拜粉：黑哨！】:http://bit.ly/2ol5XbJ
東網體育同你追實體壇每個精彩時刻！
http://bit.ly/2ecTF2A
|
鍾意就快D Share啦！
|
|
|
