鄧麗欣（Stephy）喺19歲進軍樂壇，放棄加入香港排球隊嘅機會；為咗重拾夢想，2年前Stephy領軍成立排球隊Loey，經常參加公開比賽，不過，日前有讀者向《蘋果》報料，指有人喺facebook公審Stephy，質疑Stephy喺Loey輸波後賴地硬！呢位自稱係Stephy嘅fans，喺fb點名狠批偶像：「從小就聽鄧麗欣嘅歌曲長大，因為我都係佢粉絲，都幾喜歡佢，點知今天發生嘅一切，都令我好後悔曾經做過佢嘅支持者。原來香港女星鄧麗欣經營嘅呢隊女子排球隊品格係咁差劣，真係令人好嚇怕，輸打贏要，賴地硬嘅呢種態度出現喺眾目睽睽嘅場合，實在有失身份，現場咁多粉絲同支持者，都做出一啲鬧球證嘅卑劣行為，真係教壞晒啲球壇以外嘅市民。」據該網民喺fb嘅留言，包括hashtag「#球證工作係要公平公正#啱呀判到你贏25比就最公正啦#又唔抄我牌即係我冇機會停牌一個月好失望#感謝觀眾席嘅人同同工們嘅支持」，估計留言嘅，就係該場排球比賽嘅球證。該網民指自己以前好欣賞Stephy幫忙推動香港排球，但原來都係一個為求利益，將是非黑白顛倒嘅人，真係對呢隊波感到好失望。仲hashtag「#好傷心阿欣用咁差嘅態度同我講嘢#你有冇專心睇住自己條線嚟吹波#邊條線呀事業線呀#你可唔可以進步下#乜都唔識吹淨係識畀牌」。《蘋果》向Stephy了解事件，佢喺電話澄清：「其實我當日冇同呢個球證喺比賽以外講嘢，而比賽以內嘅，因為我係隊長，所以喺比賽當中有任何問題，我都要去出聲，要同球證去講，嗰日有好多誤會嘅球，例如一啲可能out嘅波，佢就判咗in，有啲可能我哋覺得對方犯規，佢又冇吹到，我作為隊長要出聲要講，如果作為專業球證，我都係做番隊長身份，如果佢覺得我質疑佢嘅判斷而有不快，我覺得佢唔夠專業囉。」Stephy強調自己絕對冇態度差：「我都係講番事實，最後佢堅持佢判決，我都尊重佢冇同佢拗，我覺得呢啲係球場經常發生嘅事，如果佢覺得咁樣係有問題，我都唔係好明點解囉！打完呢場波，教練有同佢講番判錯球，叫佢下次做得好啲，我都唔清楚佢哋講乜，因為打完波自己換衫梳洗，唔係好知佢哋講乜，唔知係咪咁樣令到佢唔開心，所以寫咗呢篇嘢。」對於被人喺網上聲討，Stephy理直氣壯表示：「我覺得佢有少少刻意攻擊，唔係平心嘅評論，但無論點都好，如果令佢有乜唔開心，我哋都好抱歉。」不過，Stephy不甘被針對，出聲捍衛球隊：「但我想講，我呢隊Loey絕對唔係品格差劣嘅球隊，我哋每一個球員都好有禮貌，唔會做出啲咁嘅行為，大家都知喺比賽當中好多時有情緒，如果佢覺得呢啲係有問題，可能佢唔習慣，anyway如果佢覺得唔高興，我願意代我嘅球隊同教練say sorry，希望佢公平啲，唔好刻意攻擊我或球隊，自己喺呢行接受批評冇所謂，但我嘅球隊絕對冇做唔啱嘅嘢，如果畀人咁講唔係幾好。」
|
鍾意就快D Share啦！
|
|
|
