大埔手機黨出沒注意！一名姓鄧六旬翁，昨日下午放工後擬往買餸後返家，惟卻遇上一名男子，聲稱因「輸晒啲錢冇錢開飯」，要賤賣手上玫瑰金iPhone 6 Plus手機，並由2,000元減價至1,000元成交，伯伯起初滿以為「執到平嘢」，給家人看後，經重開機始發現是沒法運作的山寨機，料已遇上騙徒。其女兒知悉事件後，遂將事件上載fb分享，盼大埔街坊注意。據鄧伯的妻子透露，鄧伯在區內經營學校飯盒。事發於昨日下午5時許，鄧伯擬往大元邨街市買餸，詎料卻遇上一名年約50歲的大叔，對方聲稱因賭博而輸清光，遂遞給鄧伯一部iPhone手機，指往手機舖放售只能賣上800元，認為不止此價，遂盼鄧伯能以2,000元收購。「伯伯初頭都唔理佢，後尾嗰男人係咁纏住佢，好煩，又講價去到1,000元，見部機又着到又新淨，唔似賊贓，可能貪貪哋心，於是就畀咗錢佢。」鄧妻續稱，丈夫返家後，曾向她們展示其所購手機。「我哋都好奇怪，照計iPhone機係有上鎖界面，但嗰殼係iPhone殼，望落嗰設定，又真係顯示為iPhone 6 Plus。」在半信半疑下，她們將手機重開機，詎料怪事即時發生。「熄咗機再開番就冇啦，知道假啦。」原來該手機經重啟後，顯示的時間為2008年年尾(當時iPhone只發佈第一代手機)，並出現簡體字及GPS定位，完全未能正常運作，此時鄧伯才驚悉受騙。「無可否認，伯伯都係有少少貪心，先至被人呃。」鄧妻解釋，因其丈夫未有用過iPhone，所以未識分辨，指今次亦是鄧伯第一次被騙財。鄧伯的女兒獲悉後，遂將父親的不幸遭遇上載fb「Tai Po 大埔」群組分享，藉此提醒「谷友家中老人家」提高警覺，如遇到同類情況唔好上當。至少有兩名網民見貼亦分享其家人亦曾遇上手機黨，手法如出一轍，盼大家小心為上。根據資料，騙徒在街上兜售假iPhone屢有發生，如去年11月，北角有街坊遇上騙徒，對方指「等錢使」願以4折轉售其iPhone 7 Plus，他不虞有詐以6,200元買入兩部送給家人，回家後始知是高仿假iPhone而被騙財(http://bit.ly/2g8OHqB)。【網民點睇】
Ching Yip：便宜莫貪！今次當賣個教訓！
版主：行Android嘅iPhone。
玉琼：老人家唔識分，所以專呃老人家。
Jayden Chow：有無咁大隻蛤乸隨街跳。
Adamw Lam：陌生人的東西什麼也不可要，無論要錢不要錢。
Harold Poon：總會有一個中招，好似電話騙案你敢爆，我敢獎！ 即Call《蘋果》24小時爆相爆片熱線：63836568
|
鍾意就快D Share啦！
|
|
|
