王君馨花曼上身 Man抱新郎
藝人王君馨（Grace）決定於7月11日在港與老公Daniel舉行婚禮，二人日前秘密出發歐洲影婚照。趁着昨日「520」普通話諧音「我愛你」的日子，Grace率先大晒恩愛婚照！着上爆乳西裝裙的她大騷深長事業線，更調皮地「花曼」上身單手抱住老公！她透露此行充滿「愛的考驗」，例如行李延送及摸黑冒寒拍攝等，不過一樣冇有怕，更發表愛的宣言，認真甜到漏！
藝人王君馨（Grace）與圈外男友Daniel結束愛情長跑，已簽字結婚的二人將於7‧11在港舉行婚禮。Grace透露特意選擇於拍拖12周年紀念日行禮，正式退出「處女黨」！兩人日前更低調出發到布達佩斯及佛羅倫斯等，拍攝浪漫婚照。
只見Grace打破傳統，先以一套由Marco M Chan設計的西裝婚紗裙爆乳上陣，晒出深長事業線，依偎老公Daniel懷抱，流露幸福笑容。早前憑劇集《城寨英雄》「花曼」一角奪獎的她，自言與老公私下相處時會變得孩子氣，故拍攝時一度「花曼」上身，單手將老公抱住，盡顯功架。其後Grace換上一套喱士透視高衩裙，透出雙峰之餘更有無敵美腿，畫面靚到似足拍廣告照。
行李未到阻進度
Grace透露今次拉住老公去歐洲，一心圓在外國拍婚照的夢想，豈料過程困難重重。兩人到埗首日就遇上「人到，行李唔到」的情況，她說：「今個trip非常難忘，因為我同Daniel都係第一次去歐洲。最辛苦係第一日去到布達佩斯，啲行李運唔到嚟，而我哋淨係得一日嘅拍攝時間，當日差唔多下午四點半喺酒店先攞到行李，好彩太陽落山落得遲，急急去影。」
錯估天氣凍到痹
她又稱因錯估當地氣溫而要冒寒拍攝，幸有老公送暖：「之前聽當地溫度好似係27度，但我哋到埗發現日頭得13度，溫差仲好大，夜晚剩番7度左右！我哋啲衫好薄，硬住頭皮去影，當然有Daniel喺我身邊都冇咁凍，但我哋都震到成個人硬晒，手指、腳趾都已經凍到麻痹！」
談到其「爆乳西裝婚紗裙」有別於傳統婚紗，Grace笑指尚有另一套婚紗正在製作中。老公Daniel曾表明不希望其嫁衣太過性感，故今次拍攝時性感上陣惹來途人望實，亦令老公睇唔慣：「我哋之後去佛羅倫斯，我着住套白色西裝裙周圍走，Daniel有少少唔慣咁多人望住我。其實套西裝裙唔係好暴露，雖然好緊身，但我覺得西裝最着到我嘅性格出嚟，比較瀟灑。」
Grace又發表愛的宣言，稱對婚禮相當期待：「呢次trip經歷咗好多unexpected嘅嘢，心情似坐過山車，無論係天氣、冇咗行李、拍攝啲景唔係我哋想像等，我發覺我想擺更多時間去了解Daniel多啲。可能分隔兩地太耐，我哋好似停留咗度蜜月或初戀階段，漸漸踏入婚姻就覺得雖然認識好耐，但都好需要互相遷就、同行、同步。我非常熱切期待直到7月11號會發生嘅所有嘢！」
文：影視組
|
鍾意就快D Share啦！
|
|
|
