慈善伶王新馬師曾（鄧永祥）過咗身已20年，佢同祥嫂洪金梅所生嘅4個仔女o依家感情仲好好，小艾負責做管家婆，兆榮就負責為家族資產做投資，最細嘅碧玉就學緊中醫同命理。至於長子兆尊半息影後，工作上唔見有突出表現，但感情生活就非常精采，佢身邊經常有3個紅顏知己——Carmen、前助手車厘子同Claire相伴，而佢亦承認同佢哋拍緊拖，最好嘅係3位女友可以相處融洽（新聞連結： http://bit.ly/2lnGiA1 ）。「御女有術」嘅兆尊日前以1拖3姿態去銅鑼灣食晚飯。日前（13號）晚上約8點幾，《蘋果》撞到兆尊現身銅鑼灣黃金廣場，佢仲帶埋3位女友一齊食日本串燒，佢哋一行4人喺餐廳逗留咗個幾鐘，佢哋食飯期間有講有笑，三女情如姊妹般互相照應，有時更會一齊講嘢頂撞兆尊，搞到佢好冇癮。兆尊一行人於晚上9點幾埋單走人，落樓後佢哋選擇步行返屋企，當行到灣仔鵝頸橋街市生果檔口，3女突然叫停兆尊，話要買水果，不過兆尊就冇自己落手揀生果，只係3女自己喺度左揀右揀，揀完之後，佢哋3個各自買咗一袋，然後兆尊就負責俾錢。買完生果後，兆尊同正印Carmen就向永祥大度方向行返屋企，而車厘子、Claire就同兆尊佢哋講拜拜後，向另一方向離開，沿途見到車厘子一路同Claire雞啄不斷，直到家門，車厘子再同Claire拜拜，Claire就過一條馬路返上樓，佢3位女友全部搬晒嚟灣仔，主要都係為方便兆尊。聽講兆尊盡量做到公平，一個禮拜裏面，佢會每個女友陪兩晚過夜，第7日就係佢自己私人時間，佢可以選擇自己一個人過。而3女都覺得合理，所以都同意呢個安排。
| （採訪、攝影：羅德光、梁繼光） | | |
| | | |
| | |
|
鍾意就快D Share啦！
|
|
|
