「即使一句傷盡我心的說話，若實在是真的請講呀。」（黃凱芹《傷盡我心的說話》歌詞）以下嘅對話內容，又真係幾hurt吓。日前喺空姐界就瘋轉一段「趣事」，有 ...
「即使一句傷盡我心的說話，若實在是真的請講呀。」（黃凱芹《傷盡我心的說話》歌詞）以下嘅對話內容，又真係幾hurt吓。日前喺空姐界就瘋轉一段「趣事」，有自稱林太嘅網民，就喺空姐群組中，爆出早年有位男乘客，喺飛行途中，Chok住走去機艙嘅廚房，同服務員講：「Excuse me，我今日唔影相、唔簽名。」當時接待呢位乘客嘅兩位90後空中服務員，就「哦」咗一聲，當乘客返回座位時，就忍唔住問其他資歷較深嘅同事，問呢位乘客「係乜水」。睇完座位人名表，資歷深嘅同事就笑住話：「哦！原來係佢！難怪你哋唔識。」網民仲不忘貼咗呢位明星朋友喺機艙嘅相，雖然打咗格，但其實張相早喺兩年前，已經曝咗光。而呢張相嘅主人翁，就係80年代「情歌王子」黃凱芹。不過該空姐群組嘅專頁，俾人瘋傳咗1日後，就已經俾人刪咗個post。隔咗1日，黃凱芹終於喺微博，回應呢件事：「2015年4月30日，和助理坐飛機經香港去大陸工作，當時還拍了些照片放在微博，哈哈，想不到，兩年多後，照片還有利用價值！」講晒成件事，都似乎冇講到重點─究竟有冇chok住去叫人唔好搵佢影相同簽名，不過黃凱芹都趁機sell吓自己今個月出嘅新專輯，又話要多謝呢位幫佢「宣傳」嘅空姐朋友同網民嘅愛戴，可以幫佢製造話題造勢。仲話要打俾對方多謝佢哋。之後黃凱芹再喺微博上留言話：「很多人想我投訴，但我是CX(國泰)的鐵粉啊！又假如，他們誤交損友，被人利用幫朋友發了個荒謬的毀謗，被人借刀殺人而不自知，那又是否犯罪？只能說是蠢吧。但當有人給我看圖3，我才覺得空姐形像都給毀了。飛機艙機器聲會很吵，不懂中英文的人世界上有很多，尤其是老人家。如果破虐的是你家人，你會投訴麼？」
