41歲舒淇今早喺微博出po晒日出相，留言：「突然想起⋯⋯⋯我已經來香港22年了!」而佢同老公馮德倫就相識20年，拍拖4年，上年9月宣佈同馮德倫喺布拉格閃婚，之後一直傳舒淇想減產造人，主動戒煙，最近仲戒酒只係聞酒香，二人用廿萬租淺水灣花園大廈築愛巢，亦貫徹低調作風。舒淇同馮德倫結婚唔夠一年，今日有香港免費報章報道指，佢哋現時係分居階段，更草擬離婚協議書，準備簽紙離婚，傳係因為婚後一齊生活先出現摩擦，生活習慣唔同，報道更聲稱收到消息，疑馮德倫成日要做幕後工作，令舒淇對婚後生活感到失望，馮德倫又有啲少爺仔脾氣，所以舒淇堅決離婚，又話佢哋識咗多年，先覺得感情似姊妹多啲，希望大家再見亦是朋友。報道又話舒淇喺網上吐苦水，又話二人聚少離多，又話馮德倫因工作壓力大而發脾氣，試過幾日唔返屋企，搞喊舒淇，又指舒淇單方面想生B。之不過二人本來就係圈中大忙人，不時要四圍飛，閒閒地都幾個月未必見到，大家又係圈中人，應該一早就互相體諒對方，而且之前拍《俠盜聯盟》係因為有大陸藝人臨時甩底，撬起馮德倫，舒淇原先決定放長假，都接埋呢套戲先再放假，二人感情深厚，應該冇咁易分開嘅？！《蘋果》就離婚一事，向求證舒淇經理人管小姐，管小姐喺電話中否認此事：「冇咁嘅事，啲人唔好咁黑心，成日傳呢啲嘢。舒淇係一個好感性嘅人，有時佢睇到某啲事件，見到啲嘢，想抒發一下心情，就會喺Ig或者facebook抒發吓，但係唔代表係指佢哋婚姻，佢哋婚姻絕對冇問題，總之佢兩個就好sweet sweet，冇咁嘅事。」
|
鍾意就快D Share啦！
|
|
|
