今年46歲嘅商台DJ阮小儀，早排放咗兩個禮拜大假，好多人以為佢去旅行，原來小儀秘密入院做手術，一直冇洩露口風嘅佢，到復工一刻先喺《早霸王》節目中開咪講。原來小儀甲狀腺有囊腫，好似有個波波喺喉嚨附近位置咁，今次入院，就係要割咗甲狀腺。小儀喺節目中亦有講，早喺兩年前，已經發覺身體出咗問題，最初只係失聲，但醫生話check到有啲唔妥，雖然檢驗咗唔係癌細胞，但就建議要觀察吓先。直到年初，森美喺節目中，發現拍檔頸部有異樣，最終，小儀的起心肝，決定趁今次大假，入院動手術。小儀手術成功出院復工，大家都鬆口氣，就連平時成日整蠱佢嘅森美，亦喺節目苦口婆心叫佢唔好食生魚，怕會令傷口長出肉芽。而為免令聽眾擔心，小儀亦有喺facebook貼相同留言話：「好啦，節目都講咗，喺呢度都講吓放咗2個星期假，唔係外遊，係入咗醫院一遊。因為甲狀腺左右兩邊都出現咗2大個結節，size頗大，唔切唔得，所以只好聽話，做手術搞掂佢。而家冇咗2粒大嘢，亦冇咗甲狀腺，以後每日記住食甲狀腺素補充劑就基本上ok㗎嘞！今次我好幸運遇到好嘅醫生，好嘅醫生朋友ssss俾各方面意見我，同埋好嘅保險朋友，過程一切順利！休養咗2星期後今日開始回歸《早霸王》。而家傷口入面好番嘅進程就等身體自己搞掂㗎嘞，醫生話俾啲時間個傷口會冇問題嘅！好，報告完畢。祝自己同毎一位身體健康。」
|
鍾意就快D Share啦！
|
|
|
