![]()
鄧達智（William）今年6月與同性醫生陳梓欣（Clement）訂婚，消息傳出後，哄動一時。鄧達智來自傳統圍村原居民，陳醫生來自保守醫療體系，兩人攜 ...
鄧達智（William）今年6月與同性醫生陳梓欣（Clement）訂婚，消息傳出後，哄動一時。鄧達智來自傳統圍村原居民，陳醫生來自保守醫療體系，兩人攜手突破框框，同志關係愛得坦白又公開，無懼世俗眼光。Clement早前應《蘋果》邀請，罕有接受訪問，大方談及自己的過去及未來。原來Clement同志啟蒙之路，來自一部電影：《神父同志》。Clement於訪問中娓娓道來：「我好遲先知，係大學四年班。我係基督徒，返教會，當時睇到一套電影《神父同志》，最初感覺係，喺教會度，唔係教我哋要互相相愛咩？咁當一個神父有咁嘅情況，點解我哋唔係應該更給予愛心同支持？後來發現，喺自己思想中，都有對男性有好感呢個成份，就覺得要正視啦。」其後Clement去咗一間同志教會探討，亦一如許多同性戀者，最初並無和父母提及：「爸爸嗰時過咗身，媽咪係健在，但呢個問題屋企係唔容易接受，我自己當時都唔容易接受啦。」Clement當時已經就讀醫科，未考慮過將來職業，之後曾到南非做交流生，亦去過蘇丹等地做無國界醫生。鄧達智視Clement為人生真愛，Clement過去亦有幾段伴侶關係：「我覺得我以前嘅partner都好好，但William有一種對愛情嘅熱情，令人有初戀感覺嘅憧憬，係我想像不到。」兩人相差十幾年，年齡於Clement眼中，完全沒構成問題：「無！佢好後生，心智上，身體上，我白頭髮仲多過佢，咁呢點係同基因有關係啦。佢一得閒就散步，我有時間仲唔瞓咩，攰到死。」訪問當日有段插曲，為了影大草地及夕陽之光嘅相，訪問臨時改到灣仔君悅對面花園進行，無做防蚊措施，Clement、William同記者們一齊狂餵蚊，流住汗狂搲痕之際，Clement發揮醫生本色：「我見到有啲真係白紋伊蚊！」唔係啩！
