樂瞳（本名龔茜彤）今年6月約滿無綫，跳出工作咗十年嘅公仔箱之後，第一個決定就係大解放推出處女寫真集《See La Cilla》，幫30+1嘅「淑女時光」留紀念。樂瞳話今次寫真喺檳城拍攝，而主題就係sell健康，以前喺大台做開都係小妹妹、純情嘅形象，而今次寫真仲會大騷32D、24、32魔鬼身材。除咗大騷胸前事業線，亦勁騷股罅，樂瞳仲會着住多窿泳衣浸浴，大玩濕身誘惑。
樂瞳早前接受《蘋果》專訪時大呻喺大台十年搵唔到錢，但得到嘅喺「樂瞳」呢個名，同名氣。跳出大台，樂瞳急起追數，過去呢三個月，佢頻頻接到內地商演，樂瞳財政狀況大逆轉，佢今日接受《蘋果》電話訪問時話：「呢三個月真係好感恩，自從離開舊公司後，好多唔同朋友同客戶幫忙支持，呢幾個月賺咗全年人工，我都非常安慰。」
大台始終人工奀，樂瞳跳出三個月即賺咗佢喺大台成年人工：「我唔會咁樣停落嚟，仲會繼續努力，今年目標係想賺多啲錢請家人出埠旅行，畢竟我影寫真集，有正面同負面聲音，父母會擔心，而我嘅角度，影寫真只係青春紀念，相比人哋我可能遲咗，當然都唔希望影咗寫真就定型咗我係性感形象，我仍有其他嘢同大家分享，希望大家記住我係健康性感嘅樂瞳。」以後拍戲會唔會調低性感底線？樂瞳話：「睇劇本配合度，究竟自己可以接受幾多，演員係要專業。」
近日賺多咗，樂瞳會唔會大使咗？佢話：「我認為自己某方面係大使，但有啲方面我又好慳，我捨得使錢落朋友同家人身上，我會請客。」樂瞳自爆捨得花錢去旅行同食嘢，至於買衫同包包，佢話就唔會太追求，佢鍾意mix and match，佢話最想儲錢置業，佢都擔心自己大使，所以o依家賺到錢會交畀媽咪管理。
來源 source: http://hk.apple.nextmedia.com
|
鍾意就快D Share啦！
|
|
|
