在加拿大滿地可長大嘅湯盈盈，出名熱情，性格又夠開放，曾經係無綫御用「狐狸精」，演技到位。不過，盈盈自從2012年嫁咗俾錢嘉樂之後就「從良」，謝絕性感演出，仲為嘉樂誕下4歲大女錢凱晴（Alyssa）同下月便2歲嘅細女錢凱琪（Kassidy）。
據悉盈盈婚後曾想過退出幕前，專心相夫教女；但由於無綫近年常有好戲之人離巢，盈盈獲極力挽留，並安排演出處境劇《愛回家》系列，返工同放工時間較穩定，令盈盈可以騰出多啲時間照顧小朋友，又可以幫輕頭家，搵多啲奶粉錢。
大前日下午四點鐘，盈盈駕駛寶馬接載大女Alyssa去灣仔洛克道一楝商廈，大廈內有幾間playgroup，估計盈盈係帶囡囡去上堂。盈盈先將車停喺附近讓代客泊車，見佢一馬當先落車，行去後座位攞咗一個背包同手袋，然後就開前座車門俾囡囡落車。而由落車位置行去商廈，雖然只有約兩分鐘步程，但見Alyssa拎住隻匙羹，好用心咁舀起膠袋裏面嘅食物，全程行得好慢好慢，一直跟住背後嘅盈盈好有耐性，冇鬧囡囡之餘仲笑得好開心。用咗大約雙倍時間行到去門口，Alyssa突然扭計仔，踏咗幾下地，仲唔小心將食物跌咗落地下，盈盈就幫手執番起，好有公德心。
盈盈噚日接受傳媒訪問時，就否認囡囡有扭計，佢話﹕「佢將啲食物放上匙羹上面，因為要平衡唔想食物跌，所以行得好慢。(見你好開心？)我望住啲囡就好嗒糖，覺得佢哋好得意。」盈盈透露囡囡當日係去上美術堂，話大女已過咗頑皮階段，反而細女有啲會曳啲，佢笑笑口話﹕「細女頑皮啲，仲好大膽，有佢老竇身手。」
| 盈盈好享受家庭生活，每次提起兩個女就笑到好冧。(攝影﹕徐錦池、吳耀輝) | | |
| | | |
| | | |
|
鍾意就快D Share啦！
|
|
|
