藝人張繼聰和老婆謝安琪（Kay）所生的囡囡張靖（Karina）半歲大了，阿聰呢位廿四孝爸爸就同老婆、仔女、張父齊出去外食飯慶祝，三代同堂溫馨滿瀉。
繼續做「大埔乳牛」
Kay接受東網訪問時，被問到如何同囡囡慶祝半歲大，她表示：「本來冇乜特別慶祝，只諗住喺屋企食飯，但咁啱我屋企有一個姐姐（女傭）又放假，費事搞到咁忙咪出街食囉，臨急出街食，又冇乜好隆重嘅嘢搞，有啲人又話買蛋糕，但都冇用啦，佢（指B女）咁細個都未食得，咁我咪話得啦，畀佢坐喺度感受吓氣氛」她又大讚仔仔張曕好好，好愛錫妹妹，因仔仔覺得人人都有美食，但妹妹又未能食固體食物，感到好可惜，Kay說：「仔仔話不如搣小小麵包佢（妹妹）食，所以就拍咗嗰條片，哥哥餵妹妹食麵包，哥哥知佢六個月大吞嘢唔係好叻，哥哥好細心，真係搣到好細，細到冇可能啃親嘅地步，食咗落去都唔知食咗啲乜嘢，哈哈，令佢（妹妹）都參與呢個慶祝活動，我都覺得我大仔好好，個人好溫暖，真係睇得出佢，係真心好疼錫妹妹囉，妹妹食完，哥哥又幫佢抹手，妹妹食到好多口水又幫佢抺口水，呢啲我冇叫佢做，但佢好主動去做，我覺得十歲小朋友，好難得囉。」問Kay現時是否仍做「大埔乳牛」餵哺母乳，她說：「仲餵緊奶㗎，一路餵緊，仲好努力嘅！」
講到妹妹和哥哥餅印一樣，她覺得是攝影問題：「佢（妹妹）好嗲嘅，但唔知點解，阿聰影親佢都好似男仔咁，但我影佢又變番女仔，真係冇計，攝影師嘅功力唔同，囡囡依家變得較女仔，咁媽咪影相有心機，但爸爸就求快手成日影到佢男仔咁，但我影佢時又幾女仔，都甜美㗎喎，但啲人個個都話同哥哥一樣樣！」
叫「爸爸」先機會大啲
問囡囡識叫媽咪未？Kay就話囡囡好「健談」，但因是bb話，只發出不同的近音，又聽得不太清楚，故未能確認她說甚麼，不過她覺得囡囡應好快識說話：「有時我問佢（囡囡），你咁夜做咩仲唔瞓，等邊個呀？佢會答：『嗲嗲！』真係唔知真定假，咁啱timing，有時又成日講：『咯咯』，好似叫哥哥咁，有陣時，好肚餓或眼瞓就會嗌：『孖me』真係又好似講咗媽咪咁，但我又覺得冇咁快嘅，覺得佢似撞口神，可能佢對於講嘢會快啲囉，發展得快，但暫時未見到邊個會跑出，我哋三個會密切留意住，睇吓究竟係媽咪、爹哋定哥哥。（估係爸爸機會大？）我都覺得係，佢叫爸爸係肉緊啲嘅，叫媽咪、哥哥都少啲，叫爸爸、爹爹都叫過，我覺得佢（叫爸爸）機會係高啲，媽咪講過一兩次，爸爸都出現得最多嘅，我諗都係叫爸爸架啦，爸爸做嘢辛苦，第一個叫爸爸都值得嘅，值得嘅。」
|
鍾意就快D Share啦！
|
|
|
