郭富城湊小公主唔夠膽換片餵奶
貴為影帝的郭富城拍過唔少警匪片，見慣大場面，槍林彈雨都無有怕，但在見證囡囡出世時，卻緊張到剪臍帶都手震，唔怪之得佢話：「見到個女，覺得全世界轉變晒！」嗰一刻一家三口感動到齊齊喊。而視女兒為小公主的他突變深閨男，謝絕好友邀約，每次收工都趕返屋企湊B。
現年51歲的天王郭富城今年4月與肚凸凸的方媛拉埋天窗，已被指是雙喜臨門，隨後又傳出方媛早前已為城城誕下千金，到9月22日城城終於在社交網上載一家三口手牽手的「全家福」，與大家分享喜訊。
榮升人父後的城城昨晚首次出席公開活動，聽到傳媒恭喜，即風騷咬眼鏡邊扮型，並說人生好完美，好感恩。城城以小公主來形容囡囡，並透露女兒是順產，6磅重，問他有冇親手為囡囡剪臍帶？他說：「有，好緊張，手都震埋。」
等長輩改名
問到新手爸爸可有幫忙餵奶、換片？城城說：「唔係好夠膽住！抱就有。（似你？）似一個Mini版嘅城城咁，好得意。」說到太太為自己生B的辛苦，城城即眼紅紅：「太太佗咗10個月，好辛苦，出世嗰刻好感動，覺得個世界轉變咗咁。（有冇喊？）三個一齊喊。（獎勵太太？）梗係會，同埋做爸爸個感覺好奇妙。我想做好爸爸嘅責任，建立好好嘅家庭，我亦睇到太太懷孕嘅辛苦，所以自己要再踏實啲工作，希望兩邊都平衡到。」問到母親是否很開心？他眼濕濕說：「最開心係佢，見到佢抱孫，嗰種開心，我比佢更開心。（催你生多個？）順其自然啦。」續透露女兒仍未改名：「希望長輩、媽媽嗰邊幫佢改，依家叫佢『BB』。（會不會擺滿月？）未必，（到時）會一家人食餐飯。」
天王變深閨男
他亦表示現時人生很完美，囡囡出世是他人生最開心的一件事，亦是人生另一階段。而城城表示現時每日都會為囡囡影相留念，並拍片紀錄最真的一面，但低調的他不會將相片放上網。
他又指現時當囡囡是小公主般疼錫，並大爆囡囡令他變得深閨，連朋友都找不到他：「以往可能同啲朋友食吓飯，依家都好少，通常收工都返屋企。（多朋友嚟探你？）好多朋友都想，但始終BB太細，等農曆新年啦，到時BB又大個啲。」
他透露目前已恢復拍戲，問到有冇唔捨得囡囡？他說：「一定會，但當我拍戲都會好專注，收工嘅時候可以視訊，依家科技發達可以幫到手。」
採：音樂組、名人組
文：音樂組
攝：吳文聰
|
鍾意就快D Share啦！
|
|
|
