歌手江若琳（Elanne）為即將舉行的演唱會準備，近來每日都進行綵排，24小時都不夠用，因為每日起身就要跑步做Gym，之後要練歌、排舞。她又自爆上星期更緊張到日日失眠，但幸好「生煎包王」男友蕭潤邦（Oscar）鬧醒她，她謂：「有一晚我瞓唔着打畀佢，佢就開解我到朝早6點，佢話『其實一件咁開心嘅事，一件失而復得嘅事，天重新畀番個演唱會你，你係咪應該好好去享受，而唔係變成壓力，你咁大壓力係因為無時無刻都喺個演唱會入面，冇晒自己生活』，所以佢依家每日都逼我一定要有一、兩個鐘係要畀自己放鬆，談天說地，例如睇戲、捉棋乜都好，唔關演唱會事先可以放鬆自己，用咗呢個方法之後我好咗好多。」
演唱會會有surprise
Elanne亦謂Oscar的說話是當頭棒喝，令她明白大家入場不是想睇她操得有幾勁，而是想睇最真實的她。問到Oscar會怎樣支持她？她說：「佢會負責晒台前幕後嘅膳食。（仲有冇其他？）佢精神上嘅支持同陪伴已經好緊要，佢都好忙，要負責分飛。」她透露今次會唱其他人的歌，例如同是2007年新人的歌，他們到時會以特別方法出現。另外，她表示到時會跳舞：「但今次唔係勁歌熱舞，係party感覺。（會唔會有高難度動作或跳辣身舞？）會有一part好有驚喜，係我從來未跳過嘅舞，可能係跳啲深情或有故事性嘅舞。」問到歌衫可會性感？她笑言：「都有少少性感，但極其量只係畀個背脊大家睇。（係咪Oscar唔畀你騷前面？）唔係，其實我背脊同前面冇乜分別啫。」
抗拒人前浪漫
而講到有指兩人戴上訂婚戒指，並已秘密訂婚，她即澄清：「係情侶戒指咋，大家唔好諗咁多。」問到會否期待到時Oscar在台上向她求婚？她笑言：「絕對唔會，大家放心，一定唔會，佢咁做我同佢反面！踩我場想死呀？（你唔會覺得咁做好surprise？）我覺得呢件事兩個人去實行就ok，有一種浪漫係我哋自己知，而唔係擺上演唱會。（唔接受喺騷上求婚？）唔係嘅，但如果玩啲咁嘅嘢我會好失控，大家係買飛入嚟睇我唱歌，而唔係睇求婚。」而講到好友葉文輝（啤梨）入紙與未婚妻註冊結婚，她笑言：「佢都應該啦，搞咗壇大龍鳳，佢簡直成為指標。（你會唔會想快啲到你結婚？）隨緣啦，同埋呢啲都唔係我決定。」
|
鍾意就快D Share啦！
|
|
|
