掃呢頁CODE去手機

2017年10月5日 星期四

日本開齋 香港再過夜 袁偉豪攻破守身張寶兒 [壹週刊 - 1439] __,袁偉豪,張寶兒,M1,

樹熊上身樹熊上身,當袁偉豪係樹攬到實,張寶兒冧樣現晒形。娛頭日本開齋 香港再過夜 袁偉豪攻破守身張寶兒專吼港姐的袁偉豪,因為在非洲拍特輯,順手撻着有個 ...






樹熊上身

樹熊上身,當袁偉豪係樹攬到實,張寶兒冧樣現晒形。

娛頭

日本開齋 香港再過夜 袁偉豪攻破守身張寶兒

專吼港姐的袁偉豪,因為在非洲拍特輯,順手撻着有個三億富爸爸又嫩口的一六年港姐張寶兒,但係女朋友是守身如玉的虔誠基督徒,正值壯年的袁偉豪莫非要過禁慾拍拖生涯?實質拍拖短短兩個月,男方已急不及待策劃攻破處女黨大計,上月孖住張寶兒飛沖繩再去東京過了八日同房二人世界。

上週日(九月二十四日),八日旅程結束,兩人玩到謝晒殘到爆返港,旅程有幾盡興心照!朝夕相對八日都未夠喉,當晚張寶兒再跟袁偉豪返回清水灣半島的屋企繼續「宿多宵」,熱戀中的男女共處一室,你懂的!

拍拖大過天

號稱「港姐殺手」的袁偉豪,同一二年港姐岑杏賢甩拖唔夠一年,火速搭上細十一年的一六年港姐張寶兒,新歡是守身如玉的虔誠教徒,大方認愛後,俾記者問到是否堅守拒絕婚前性行為時,她堅定回答:「我有自己底線,清楚自己做緊咩。」加上她億萬千金的身份,袁偉豪唔敢輕舉妄動, keep住循規蹈矩,吼準女友肯落疊去旅行過二人世界,袁偉豪連有份擔正的《使徒行者 2》的首播活動都大膽缺席,無非都係想借今次日本之旅攻破處女黨。

難怪首站沖繩行街被踢爆,他火氣十足回應:「嚟到呢度見到我哋即刻用手機影,唔好同我講食得鹹魚抵得渴,我絕對唔認同!」





埋身搭肩

全日同女朋友保持距離,落到無人的停車場,袁偉豪搭住張寶兒膊頭邊行邊講。





小鳥依人

張寶兒唔抗拒,袁偉豪再下一城攬實女友,其間還不停上下又捽又 chok女友手臂。





上月《使徒行者 2》舉行首映大會,所有演員都有出席,獨欠閃咗去日本度假的袁偉豪。







等行李期間,袁偉豪刻意保持距離,張寶兒卻落足嘴頭撩傾偈,終於氹到男友冧笑回望。





三件行李袁偉豪一手包辦,唔使張寶兒操心。





日本之旅盡興而回,袁偉豪黑眼圈兼鬚根浮面,極殘!





對足八日都唔夠,返港後張寶兒跟袁偉豪返清水灣半島過夜。

見足八日再過夜

八日的沖繩加東京之旅結束,上月二十四日晚,兩人返抵香港,袁偉豪格外拘謹,刻意同張寶兒沒有任何親密舉動,保持距離,等候行李期間兩人坐埋一邊等,起初男方扮忙執袋、篤電話,但經不起張寶兒多番出手,眨吓眼兩個已經雞啄唔斷,有講有笑。等到頸都長,終於等到行李出現,袁偉豪自動波行埋行李帶一手包辦,張寶兒繑埋手坐住等,之後兩人便向住三號停車場的方向離開。遠離人群,袁偉豪的戒心放低,疲態殘樣亦相繼浮現,八日的旅程用咗幾多精力,有眼睇!

當晚袁偉豪安排好的士接送,兩人孖咇返回男方位於清水灣半島的住所,直到深夜都未見張寶兒離開,熱戀中的情侶真係分外癡纏。





袁偉豪搵女友充當攝影師替自己拍照。





兩個連睇相都唔放過卿卿我我,眼寃!

充闊佬去半島

以前同舊愛岑杏賢開餐,都離不開平民的茶記、大牌檔,如今新歡張寶兒是億萬千金,袁偉豪自然識做,早前兩人拍拖搵食,開餐的地方隨即連跳幾級變成貴氣過人的半島酒店嘉麟樓,由於兩人坐近餐廳門口,分外惹人注目,所以食了僅僅一個鐘便埋單走人,袁偉豪還體貼幫手拎打包食物,兼護送女友上車,然後發揮他車手的本色,在梳士巴利道左穿右插,劈住飛落九龍灣星影匯趕住睇九點半場。

預先網上購票的張寶兒先行攞飛,然後兩人電兔般行去入場,由於職員指未夠鐘,袁偉豪孖住女友先行離開人頭湧湧的買飛範圍,每逢在人多地方,袁偉豪都會周圍望,警覺性甚高,行了一圈仍有時間,袁偉豪走到《寶貝神車手》的宣傳攤位,要求女友幫手影相,兩人卿卿我我打情罵俏,玩到夠鐘才施施然入場。





女友貴為億萬千金,袁偉豪都專揀上等人飯堂半島酒店嘉麟樓開餐。





袁偉豪勁細心,先扶張寶兒上車。





昔日同岑杏賢拍拖,開餐離不開較平民的大牌檔。





五月同楊明去非洲拍《打工捱世界 II》,同張寶兒日對夜對拍出真感情。





袁偉豪高調認愛後,兩人去日本期間互相幫大家影相放社交網站。

樹熊攬到實

接近十二時電影散場,戲院外盡是散場的觀眾,袁偉豪同張寶兒自覺地保持距離,向住停車場的方向離開。落到停車場,夜闌人靜,袁偉豪頓時收起 cool樣,起初搭住女友膊頭傾偈,見對方受落,跟住行動再升級,唔知當時袁偉豪想將張寶兒隻手當成係乜,不停上下又捽又 chok,搞到女友 high晒,冧樣擺晒上面,情難自控主動投懷送抱,小鳥依人挨住袁偉豪,男方 keep住邊行邊愛撫女友的手臂,呢招完全攻破向來守規矩的張寶兒,最後還樹熊上身雙手攬腰,直至行到車位,先萬般不捨的放手上車。

中六合彩

近年袁偉豪事業當頭起,《城寨英雄》後角色一個比一個有發揮,在《使徒行者 2》做男二,激凸、露股極搶戲。最意想不到去非洲拍《打工捱世界 II》,鏡頭前做到半死,鏡頭後竟然中咗六合彩,同有家底屋企人做成衣生意,父母至少有三億物業揸手的張寶兒拍出真感情,袁偉豪不理大家有十一年的距離,照傳短訊向對方試水溫:「我要你做我背後的女人,你會點做?」張寶兒回覆話:「不知如何去做你背後的女友。」拖拖拉拉終於發展地下情,直至被傳媒踢爆,今年八月中袁偉豪先肯大方認愛話:「我未過『試用期』,大家仲需要時間去磨合。」不過面對袁偉豪連番誘惑,相信張寶兒的芳心,已經全面被攻破。





同岑杏賢拍拖兩年,一度去到談婚論嫁階段。





袁偉豪在《使徒行者 2》激凸晒 body又露股,好搶戲!

前度有着落?

同顧紀筠繼子陳浚霆孖咇睇戲,刻意前後腳入場,岑杏賢對於二人行埋拍拖大叫:「唔好亂講!」

新一代處女黨

不少女藝人因信仰而奉守戒律,堅拒婚前性行為,一代處女黨,李亞男、鍾嘉欣、王君馨、苟芸慧及岑麗香,全部已經名花有主,處女五人組幾乎名存實亡,但係有新一代接班人頂上。

陳凱琳

15年,因拍無綫劇《殭》而與鄭嘉穎撻出「父女戀」,二人愛得高調,女方經常出入男方愛巢,幾乎過住半同居生活,但 Grace堅稱力保處女光環,逼嘉穎齊齊返教會,一齊守戒。

G.E.M.

09年自爆是處女的鄧紫棋( G.E.M.),曾多次表示因信仰唔支持婚前性行為,因性是禮物,第一次要留俾老公,婚後才能拆開。

林欣彤

林欣彤曾在訪問表示,自己有信仰,是虔誠的基督徒,絕不允許婚前性行為,明言不會破戒,男友要求亦會拒絕。

花弗「牙佬」

07年香港先生冠軍入行的袁偉豪,入行後一直做閒角,直至去年在無綫劇《城寨英雄》飾「牙佬」一角人氣急升,感情更是,生活多姿多采,但唯一承認過的只有岑杏賢。

邱詠恩

06年,曾與落選港姐邱詠恩拍拖,女方更於網上平台透露擔心男友當選後多女埋身,可惜袁偉豪否認這段關係。

胡定欣

09年,與胡定欣合拍《古靈精探 B》,有指袁偉豪出盡冧招追對方,可惜俾馬國明截胡。

林夏薇

11年,與林夏薇合作《結分@謊情式》,二人戲假情真,被拍到密會撐枱腳,男方更管接管送,可惜關係維持短短幾個月就玩完。

馬沛詩

10年,參演舞台劇《我不要被你記住》,與拍檔馬沛詩撻着,拍拖年多後分手, 13年復合後,男方公開表示要儲老婆本,不過都係分手收場。

岑杏賢

14年,暗撻 12年最上鏡小姐岑杏賢,二人火速發展到同居關係,更到談婚論嫁地步,去年尾,突然爆出分訊,結束三年情。

三億千金

年僅廿五歲的張寶兒,英國倫敦大學人文地理系畢業,回港後曾做產品經理。張寶兒家底豐厚,家住跑馬地禮頓山,有傳其父坐擁三億身家,更是一位虔誠基督徒。 16年參選香港小姐,以最多票數成為「友誼小姐」,入行後,主力主持節目,包括兒童節目《猩猩補習班》、《甜心教室》、《學是學非》等,早前有份參與節目《打工捱世界》而為人所認識。

入行前,張寶兒曾與一位中學同學 Jonathan拍拖,一拍八年,加入娛樂圈後,張寶兒以事業為由提出分手。

撰文:娛樂組

攝影、攝錄:李溢敏、蕭敬漁、瀚鍾、李玄、陳亦龍


鍾意就快D Share啦!