《蘋果》專訪
千嬅&五個小孩團圓「校長靚咗」
【中秋節．是咁的】
昨日中秋節，楊千嬅與電影《五個小孩的校長》的女孩們日前相約團圓，大家合力製作白兔燈籠慶中秋，雖然有一年多沒見面，但五位小孩依然用「校長」稱呼千嬅勁親切，嘉嘉還讚「校長」：「又靚咗！」育有一子的千嬅自言不急追女，覺得要隨遇而安，笑說：「我唔敢同人講話我唔生，因為我好邪！」
楊千嬅日前和五個小孩團圓，一年多沒見，嘉嘉讚千嬅：「又靚咗！」攝影：周樂恒
楊千嬅於三年前接拍真人真事改編的電影《五個小孩的校長》，扮演全港最低薪的幼稚園校長呂麗紅，成功挽救了元岡幼稚園逃過殺校厄運，電影於前年上映，票房達4,672萬，成為該年最高票房港產片。去年4月千嬅更憑《五》片角逐金像獎影后，五個小孩在後台合十打氣，可惜「校長」鎩羽而回，小孩之一Jennie傷心到喊，要千嬅安慰。
千嬅教五個小孩製作白兔燈籠。
（左起）小雪、嘉嘉和珠女已升讀小四，千嬅笑言她們開始有少女味。
《五個小孩的校長》劇情感人，更成為前年最高票房港產片。資料圖片
幫囝囝搵伴
事隔一年多趁昨日中秋佳節，千嬅日前和五小孩嘉嘉、小雪、Kitty、Jennie及珠女相約團圓，還教她們整白兔燈籠賀中秋，千嬅見到她們笑說：「你哋又高咗喎，係咪校長即刻矮咗！」嘉嘉就讚「校長」：「好耐冇見又靚咗。」𠱁到千嬅笑到四萬咁口，開心說：「覺得佢哋大個咗，講嘢進步好多，開始變成少女。」五個小孩轉眼已讀小學4年級，千嬅的兒子Torres亦升小學了，她說：「我同個仔講嘢係男人聲，生女同生仔教法係有分別。」問到Torres有否想要妹妹？千嬅說：「我個仔係雙子座，我都仲摸索緊，佢呢分鐘話唔想，但自己同自己傾偈話要個妹妹，但過兩日又會話自己玩就可以，唔使同人分享。如果真係要有個理由再生，我哋要面對生離死別或家庭決定，確係屋企得一個小朋友係有壓力，可能淨係呢個原因，令我要幫Torres諗吓。我唔敢同人講話我唔生，因為我好邪，當年話畀人聽唔生，就大咗肚。」
千嬅考慮過為Torres生多個，讓囝囝有個伴。資料圖片
惹關公災難
此外，有網友昨貼文指千嬅的年尾騷招募18至32歲的舞蹈員，註明「少量演出經驗者優先」，結果引爆「關公災難」，網友狠批：「個世界已經變到擺明車馬話你知『我哋唔需要質素好，只要你平我就請。』」對此千嬅所屬的寰亞昨表示：「經理人公司已着手了解事件而會作出恰當處理。今次演唱會千嬅會以佢嘅專業態度，全力以赴，務求帶來最精采演出，而每個單位都係我哋超水準嘅夥伴！」
採訪：張俊銘
髮型：Jimmy Chan of Hair Culture
化妝：Angus Lee of ZING
the makeup school
場地及技術提供：Draw2
|
鍾意就快D Share啦！
|
|
|
