衛詩雅25分鐘衝線游到甩帽
忙拍三組戲的女星衛詩雅為渡海泳備戰三個月，順利以超乎自己意料的成績25分鐘完成一公里賽程，氣都唔喘！事實上她在海中央時一度擔心游錯方向，又甩帽兼飲海水，幸有驚無險成功越過維港！她笑言獲好友視為電影界代表，有意做影壇泳手Icon的她，預告明年會再挑戰。
曾考獲救生員牌的英皇電影藝人衛詩雅（Michelle）早前宣布參與渡海泳，即使先後接拍了三套新戲，仍每日抽時間練水備戰操Fit體能，視今次渡海泳運動作為一項挑戰。剛從日本完成拍攝工作回港的Michelle，昨日與「港隊飛魚」歐鎧淳、前無綫藝人黃澤鋒、模特兒黃俊豪（Jeremy）、歌手李拾壹等暢游維港，Michelle穿上水試時的一件頭幸運戰衣出戰，順利以25分鐘的成績從尖沙咀游抵灣仔完成整個賽程。
Michelle一上岸便面帶笑容，神情興奮氣都唔喘，她表示對成績滿意：「好開心，廿幾分鐘完成，比想像中快，以為要游四十幾分鐘先游到，對比平時練水係快。完成一刻都激動，覺得完成不可能任務，練咗三個月，即使臨近八號風都喺黃埔練水，覺得努力冇白費。落水時見到港隊嘅歐鎧淳同班隊友喺隔籬，自己都盡力跟上佢哋節奏，雖然好快就見唔到佢哋，但都捉到個速度，先可以咁快完成！」她又笑言收到不少祝福：「最開心係前一晚收到好多朋友祝福，叫我小心、安全，阿嬌（鍾欣潼）同小方（方力申）仲拍片畀我打氣，啲朋友話得我代表電影界，完成唔到就有啲難睇，搞到我都有少少壓力！」
明年再出戰
問到下水前的準備？Michelle笑說：「今朝四點幾起身，一定要食早餐再做足熱身！（緊張？）都會，對上一次練水係大半個月嘅事，所以落水一刻都有陌生感覺，加上練過咁耐都只係游過一次海，但我都同自己講要放鬆，要Enjoy呢個過程。」昨晨氣溫只有約20度，問到會否凍親？她笑說：「又唔會，陽光曬落嚟好舒服。游到中段有啲大浪，自己甩咗泳帽同飲咗幾啖水，不過都有驚無險嘅！（在海中央胡思亂想擔心完成唔到？）成日諗好唔好同救生員傾吓偈，我全程都驚自己游錯方向，游游吓就會畀水流推向左，加上又好似愈游愈少人咁！」
方力申拍片為Michelle打氣，更鼓勵她明年轉以自由式再戰。問明年會否再戰參加競賽組做飛魚王后？Michelle笑說：「下年都會，拍戲唔忙有時間會嚟，不過競賽就唔敢諗參賽時有講唔可以帶攝影器材落水，自己都恨喺水中央影相，當我上水之後都有好多朋友搵我影相，下年識玩，原來好多人都帶手機落去嘅！」
黃澤鋒教路
現年50歲的黃澤鋒曾於10歲時參加渡海泳，今年他被大會安排以經典泳手身份參加，以20分鐘完成，他與Michelle齊齊起步，二人因早年曾合作拍戲，故已認識，今次齊齊出賽，澤鋒以多年經驗向對方提供錦囊：「我經驗多啲，一落水，咪叫佢左手邊游出去囉！我仲同詩雅講，千祈唔好上艇，一定要完成，唔係好冇面！不過，詩雅我都好欣賞，佢滿有信心，臨出去時同我講唔會！見佢游完全程，我都好戥佢開心！」
另外，Jeremy夥拍Michelle和李拾壹被挑選一同參加，三個月前一同接受地獄式集訓，問到三個邊個游得叻啲？他說：「佢哋話我游得最快，不過詩雅跟得好貼，佢好有鬥心，成日要挑戰我，之前喺泳池游三十個塘，我同佢只係相差1分鐘，今次渡海泳我一上水就見到詩雅喺後面！反而李拾壹就遲過我哋啲。」Jeremy又讚Michelle捱得，指她受訓期間試過抽筋及嘔吐：「因為要做成千下體能，有次佢拍完通宵戲就嚟，唔夠瞓，所以嘔。」受訓雖然辛苦，但三人身處大海，卻樂在其中，已相約下次再參加。
文：影視組
|
鍾意就快D Share啦！
|
|
|
