郭秀雲（Sharon）係吳綺莉同卓林兩母女圈中嘅好朋友，一向敢言嘅Sharon就對於卓林宣佈同30歲教師Andi出櫃就感到失望，仲喺卓林facebook留下「Shame on this creature！Auntie Sharon is most disappointed」，矛頭直指任職幼稚園教師嘅卓林女友Andi。
《蘋果》就打去搵Sharon瞭解事件，佢表示同佢哋兩母女唔係一日之交，識咗好耐：「我幾錫卓林...本來，好幾年前見呢個女仔，覺得佢得意，鍾意動物、畫嘢，同我三更半夜電話text傾偈，當我大姐姐傾偈，基本上我唔係一般嗰啲大姐姐，同佢傾得埋。」
Sharon絕對唔係反對卓林同性戀：「我有好多朋友係同性戀，識得有啲係非常之叻，兩個女人結晒婚，做嘢好叻係老闆，係死黨一齊去潛水又有，絕對冇歧視佢哋性向，男又好，女又好，好多喺藝術方面有時比較優秀。」
Sharon指問題所在係卓林係未成年少女：「大家做過細個，都會不知天高地厚，以為乜都知，覺得好威乜都識，嗰時候好易犯錯，好容易信同行錯路，身為一個老師嘅人，佢完全無資格去做老師。」問到係唔係講緊卓林嗰同性女友Andi，Sharon話：「係，我都唔知點樣形容嗰隻嘢，好過份。」Sharon表示未見過Andi真身：「我見過好多相，佢唔敢見我。」
Sharon表示同吳綺莉通電，表示好擔心佢：「大家都係女人，大家都唔係完美嘅阿媽，體會到佢哋辛苦，有陣時覺得做阿媽好難去做，各方面行為影響到，例如用藥方面，影響到佢做嘢、講嘢，非常之唔負責任，佢自己都信埋。有啲事實真相有醫生、有record，如果有警察又好，好多嘢點發生，有發生過係有證有據，冇得改編。」
|
鍾意就快D Share啦！
|
|
|