湯洛雯啜爆羅天宇 楊怡謙謙布拉格示愛
明日就是中秋佳節，圈中一雙一對率先迎月，預演「人月兩團圓」！其中前日踏入30歲的羅天宇，獲女友湯洛雯及一班藝人好友慶生，女友更送上「肉嘴」大禮賀壽。而另一對模範夫妻楊怡及羅仲謙，昨日在捷克布拉格慶祝結婚一周年，並雙雙在網上深情示愛，放閃無極限！
無綫小花湯洛雯（靚湯）與羅天宇早年拍攝處境劇《愛．回家》結緣，繼而傳出相戀，雖然四年間二人為保愛苗而堅稱「了解中」，但早已是圈中公認的一對。早前兩人被本報踢爆於紅磡同居試婚，事後靚湯否認，但鬆口稱羅天宇早已見過家長。對於男友被指是「女神殺手」，她更力撐對方專一，投下信任的一票，可見二人發展穩定，打風都打唔甩！
岑杏賢張寶兒同場
前日是羅天宇30歲生日，人緣甚廣的他獲多名圈中好友開P慶祝，包括陳瀅、劉佩玥、何廣沛、袁偉豪的新歡張寶兒及舊愛岑杏賢同場等，女友靚湯當然有份，並在其香閨替男友大搞派對，慶祝踏入三字頭的大日子。事後羅天宇不避嫌於社交網晒大合照，並留言：「You guys are awesome! Thanks for coming.（你哋呢班人實在太正，多謝晒。）」相中靚湯恍如女主人般，企正羅天宇身旁甜蜜合照之餘，更見靚湯妹妹Cass亦一同現身，足證兩家人關係融洽。眾人玩到興起之際，靚湯更不禁送上深情一吻，與捧着蛋糕的羅天宇肉緊咀嘴，相當Sweet！冧爆一幕不但被拍下，更在網上流傳，相信二人「了解」得非常深入！
壽星仔：係開心嘅！
羅天宇昨日接受電話訪問時，被問到兩人錫錫，他甜絲絲地說：「其實我哋都了解咗一段時間，我生日喺佢屋企搞，又有好多朋友嚟。好多報道成日寫我哋，所以啲人喺度起哄話：『錫佢！錫佢！』所以最後佢畀咗個Birthday Kiss我！咁係開心嘅！」
數到甜蜜的一對又點止得靚湯與羅天宇！去年拉埋天窗的楊怡及羅仲謙繼續恩愛，最近更雙雙前往捷克布拉格，慶祝昨日結婚一周年紀念。楊怡攞正牌高調晒愛，在網上分享Sweet爆合照，只見羅仲謙單手攬實楊怡，二人深情對望，發放幸福閃光彈。其後楊怡以英文留言示愛，意指：「我哋第一年結婚周年，感激你喺我生命裏出現。」羅仲謙亦隨即轉發，並發表愛的宣言：「一年後的今日，老婆！多謝你！愛你！願你一世平安快樂！」大批網民紛紛讚好兼送祝福，識做的他亦再發文道謝：「雖然身在外地有時差的問題，大家的祝福我都一一細味，多謝大家的祝福！」
撐枱腳慶紙婚
事後羅仲謙以短訊回覆本報：「始終都係第一年，所以比較緊張。知道佢咁啱要去布拉格，我梗係乜都唔做跟住去啦，陪吓佢嘛！今次我有兩個身份，一個係老公、一個係助手，幫佢執頭執尾，同埋影吓相。我都係第一次嚟布拉格咋，希望可以搵間靚靚餐廳食吓飯，咁我哋兩公婆都鍾意熱鬧，今次又有其他朋友一齊，咪大家一齊食飯慶祝囉！」
文：專案組
|
鍾意就快D Share啦！
|
|
|
