林芊妤（Coffee）同6呎爆肌男友Weng Chak拍拖1年打得火熱，兩人不時被影到出雙入對甜蜜蜜，前日Coffee去戶外教瑜伽，Weng Chak都有做「跟得男友」陪伴左右（新聞連結： http://bit.ly/2x9UGP6 ）。日前Coffee更拖男友去飲神獸天使「騰騰雞」蔡慧欣嘅喜宴，以為佢哋兩個都好事近啦，點知被《蘋果》讀者陳先生撞見佢哋兩個忽然嗌大交，Coffee嬲到失控爆粗：「fXXk you」鬧男友，陳先生透過「爆相爆片」公開事件。
陳先生接受電話訪問表示，當時夜晚10點幾仲未散席，Coffee同男友喺宴會廳出面嘈交：「見到Coffee手舞足蹈咁，之後好大聲連講幾句fXXk you，跟住仲喊起上嚟，後嚟佢男朋友攞咗兩杯酒，叫佢坐埋一邊傾，不停咁o氹佢，又俾紙巾佢抹眼淚，但傾到最尾Coffee都係要講多聲fXXk you，之後好嬲咁起身走返入會場，佢男朋友就呆咗咁企喺度，隔咗一陣先入返去。」
從陳先生提供嘅「爆相爆片」所見，Coffee全程都表現得好激動，不停嘴咁指住男友嚟鬧，讀者仲話：「因為佢哋嘈交好大聲，好多人出出入入去厠所都見到，但佢哋都冇理，大約嘈咗10分鐘。」
其實早前Weng Chak都試過因飲醉酒激嬲Coffee，嗰次仲搞到跪地求饒㖭，今次又唔知衰乜激喊女友呢？Coffee接受《蘋果》電話訪問表示：「耍下花槍咋，男女朋友梗會耍下花槍。我嗰日唔夠瞓，為咗好小事同男友詐下嬌啫，我哋冇事呀，好好呀！不過邊有咁誇呀，可能我大聲同大動作啫，我哋好快入返去繼續飲啦，同埋我一向好眼淺，好易喊㗎啦，不過我哋仲係好恩愛呀，無事無事，多謝關心！」
問到為乜事詐嬌？係咪去飲婚宴觸景傷情呢？Coffee大笑：「唔係吖嘛！唔係唔係，我不嬲都唔恨嫁，唔講咩事啦，嘻嘻不過真係冇事，多謝大家關心。」
|
鍾意就快D Share啦！
|
|
|
