嘉賓千嬅：我明年可能退休
C AllStar紅館騷後休團 爆肌輪流喊
七年前加入樂壇的四人男子組合C AllStar，今日開始將休團各自獨立發展，前晚他們在紅館舉行休團前最後一個演唱會，成員On仔台上除衫爆肌饗歌迷，到尾聲時更因不捨而爆喊。擔任嘉賓的楊千嬅笑言：「可能我明年就退休。」着四子早日再合體。
C AllStar前晚在紅館舉行休團前最後演唱會後，今日開始各自獨立發展。
由梁釗峰、陳健安（On仔）、吳崇銘（King）和何建曦（Jase）組成的四人男子組合C AllStar今年初在「勁歌金曲頒獎典禮」上，宣佈完成本月「生於C AllStar」紅館演唱會後，將暫別樂壇各自獨立發展。前晚四人在紅館舉行首場演唱會，隨着昨晚舉行完尾場後，四子今日開始將各自獨立發展。
擔任嘉賓的楊千嬅笑言自己可能明年退休，着C AllStar早日再度合體。
男子組合出身的丁子高（左一）、蔡一傑（右一）前晚來捧場。
江美儀撇低男友吳君祥與男友人睇騷。
望非最後一次
C AllStar前晚首場演出，吸引了蔡一傑、鄧小巧、狄以達、江美儀等前來捧場。成員Jase在四人投票中勝出可以打頭陣solo表演，繼而四子合體獻唱《樂天女孩》和《音樂殖民地》等歌曲，並謂：「其實C AllStar喺過去七年，最勁唔係攞咗乜嘢獎，而係喺廣東歌上面有好多新嘗試。」四子在台上落力又唱又跳，On仔更表演跳起一字馬落地動作，全場拍爛手掌。現場播出四子互講隊友感受，On仔謂：「單飛後，無論你哋失戀、失意、冇錢都可以搵我，但最重要唔好已讀不回，畀我知你哋喺線上，我煩過你哋女友。」
擔任嘉賓的楊千嬅跟四子合唱一曲《最後的歌》後，問C AllStar是否「唔做」，四子即澄清說：「唔係解散唔做，係休團。」千嬅聞言後說：「哦，係休團，不過你哋唔好休到我退休先出番嚟，可能我明年就退休，世事難料，人生喺唔同階段會發掘唔同嘅事，需要去珍惜，希望我第一次做你哋嘉賓，唔係最後一次，繼續做好歌畀大家聽。」On仔笑住回答：「總之你一日未退休，我哋都會唱落去。」
釗峰與On仔忍不住在台上爆喊。
On仔在台上除衫爆肌，跟女dancers大跳辣身舞，引得觀眾嘩聲四起。
On仔找超時數
之後輪到King化身DJ表演電子音樂，他笑說在紅館solo五分鐘電子音樂是他夢想。接着四子換上西裝褸唱medley，On仔不但跳舞時自摸下體，及跟女dancers大跳貼身舞，更脫下西裝褸赤裸上身騷肌肉，展示一雙麒麟臂，引得台下觀眾嘩聲四起。想不到爆肌勁歌熱舞後，On仔與三子合唱《此刻無價》時，竟忍不住爆喊淚流滿面，而身旁的釗峰亦控制不住擰轉面抹眼淚。原來四子事前講明誰人先喊的話，便要負責超時補錢，結果先喊的On仔要負責找數。
臨完場前，King與On仔感激歌迷支持，Jase則謂：「之前啲人講我哋拆夥不和，其實𠵱家係我哋感情最好嘅時候，將來大家可以做唔同嘅歌，音樂唔係只局限喺C AllStar裏面，總有一日我哋會返嚟見大家。」演唱會以《總有離開的時候》作終結，並於晚上11時半完騷。
採訪：馬建華
攝影：陳俊強
|
鍾意就快D Share啦！
|
|
|
