阿聰不再沉默喇！
繼早前吳若希為保護愛女，將網友涼薄留言cap圖放上社交網大反擊後，今日好爸爸兼好丈夫張繼聰（Louis）都喺社交網貼上網友的刻薄留言，然後發表長文，字字鏗鏘護愛妻謝安琪（Kay）！事緣今日有報道指Kay生完囡囡張靖（Karina）後，進補過度未能收身，仲話Kay下身圓潤用全黑打扮遮蓋肉感身形，而網友就喺社交網上綱上線留下刻薄留言，又指兩公婆都係整容。
張繼聰有見及此，即刻將留言cap圖，然後放上社交網發文護妻，指太太嘅靚係事實，唔需要去證明，又感激太太10月懷胎之苦，係偉大嘅媽媽，全文如下：
「香港有言論自由，可惜未必每位朋友都有尊重別人嘅修養。我好少放係（喺）心，不過講我太太，我就講幾句，太陽係喺東邊升起，係唔需要証（證）明，又唔駛（使）討論，因為係事實。就好似我覺得我太太有幾靚一樣！
我感激我太太，暫時放低自己嘅事業，承受懷胎10月之苦，無微不至咁照顧我地（哋）嘅小朋友。依種已經唔係靚咁簡單，係為人父母嘅偉大。仲有，女士們生完BB，最緊要係調理身體，根本唔需要介意身形。到適當嘅時候，先開始運動配合飲食，你慌唔會fit番？
大家放心，我老婆係唔會變番以前咁，而係會比以前更健康，更fit（更靚我就唔敢講啦，因為係我心目中已經好盡吓，不過唔介意再盡d（啲）」
P.S. 睇見兩位朋友話我整容果（嗰）個位⋯⋯我笑咗」
相信Kay睇到老公嘅愛的宣言都唔會嬲豬，仲會覺得好甜，而網友都留言大讚Louis係好老公、真男人！
來源 source: http://hk.on.cc
|
鍾意就快D Share啦！
|
|
|