圈中好多藝人都有反叛史，馮盈盈亦唔例外，畢業於香港最高學府——香港大學嘅佢，未選港姐前不諳世事，喺社交網N次用粗口抒發對社會現象嘅不滿情緒，成為港姐後自然就被網民起底翻舊帳，攞嚟鞭屍！獲封為「粗口港姐」嘅佢，完全顛覆港姐「美貌與智慧並重」嘅舊有概念。
字字珠璣研究蛋白質
經過一輪沉澱，盈盈粗口就戒咗啦，不過說話技巧就昇華到另一層次。佢犀利到無時無刻擘大眼都可以「X噏」，咪誤會「X」係粗口，「X」充滿無限變化，係代數名詞，彰顯佢講嘢嘅層次隨時可去到異次元，聽到你一頭「問號」，問你死未！
我Nuts哥有日喺網上見到一段網友幫盈盈輯錄嘅「X噏」大全短片，唔係講笑，佢語無倫次嘅境界已去到一個點，但係只要大家認真細嚼，不難發現盈盈對兩性關係嘅研究，其實可以結集成書，字字珠璣，如珠落玉盤，攞埋性愛Ph.D（博士學位）亦絕不為過……
點解咁講？我Nuts哥就喺度Show畀大家睇吓「盈盈語錄」啦（P.S認真人士勿入）。佢除咗講過「喜歡研究蛋白質」呢句金句外，喺節目《#後生仔傾吓偈》，盈盈同一班後生KOL講「零壹啟示」，就爆發小宇宙話：「每個人取向都可以係0同1，有啲人選擇做0去接受1，達到完美合體同和諧嘅平衡狀態！」嫌「0同1啟示」太過Spiritual ？盈盈喺同一節目亦曾大晒營養學造詣：「我平時都鍾意食吓香蕉、桃……蝦條都鍾意！」此話一出，就連轉數出名快嘅拍檔陸浩明都瞠目結舌，頭髮亂了！
師姐師妹靠邊企
喺呢個人人做KOL、鍵盤戰士嘅批判年代，雄性動物就係鍾意呢位港姐冠軍夠Point Of View，「擦邊球」踩界嘅行為藝術夠真、夠亂咁嚟，絕對冇矯揉造作扮淑女、扮矜持。
相比起今屆出爐冠軍雷莊𠒇，同網民嘅互動係化玉帛為干戈，一副「I Don't Care ！」嘅嘴臉同盈盈嘅「X 噏」神功簡直相隔十個馬利安納海溝咁深、咁遠，正所謂「彼竭我盈，故克之。」有「兜姐」做對比，自然更令網民受落。不過盈盈唔使同「兜姐」講多謝，因為「兜姐」只會回你一句：「I Don't Care ！」
當師姐麥明詩轉去拍劇，向花旦之路邁進嘅時候，盈盈既然跳出港姐Pool，不妨Build Up自己做「Miss Sex」，開個節目「X噏」兩性關係，開班授徒教絲打「X噏」，可倣效美國名嘴艾倫迪珍妮絲主持嘅《The Ellen DeGeneres Show》，將節目變成《The Crystal Sex Show》，做名嘴好過做花旦啦，係有得諗喎！
|
鍾意就快D Share啦！
|
|
|
