呢排個個「天眼通」上身，猛話攞硬視帝嘅王浩信同陳自瑤（YoYo）婚變，話佢哋又冷戰又分居，生豬肉狂砌，傳到離晒罩！搞到YoYo要兩度胸撐老公，發表講話以釋公眾疑慮，講明兩公婆冇問題，仲話會用湯水為爭視帝嘅老公打氣！我Nuts哥都有問人點解相信婚變傳聞， 唔知仲以為佢哋兩公婆張床大過城門水塘，個個都瞓喺床下底咁分析大市！實情啲人講嚟講去三幅被，不外乎話王浩信冇時間陪老婆、為追仔嘈交，當然唔少得話佢逢女都啱，咁就咬定人哋婚變，大鑊
人人都返工，唔通人人都想返工咩！但唔使搵食呀？如果日日陪住老婆仔女，懶過條蛇，咪又畀人鬧係廢柴？劇接劇忙到連陪個女小一面試都冇時間，點樣溝女先？你可以話偷食嘅嘢，快有快啅，慢有慢歎，只在乎曾經擁有，但日日開工，乜都Chur乾、腳仔都軟無啦啦塞個蔡思貝做「小三」，對方都慘啦，乜都冇做過又賴嘢，就連無綫咪神陳偉琪都被拖落水，王浩信講明「而我不知道陳偉琪是誰」，咁你話胸懷大志嘅陳偉琪幾Hurt呢？
保住「C奶」打聖戰
最九唔搭八，就係王浩信冇Like太太個Post都係罪！早排林盛斌（Bob）寸老婆三更半夜披頭散髮去換片，驚嚇度十足，Bob嫂就還拖，窒老公瞓覺成條浮屍咁，望佢似瞻仰遺容！阿Bob又咪冇時間陪老婆兼公然互片，又唔見話佢婚變？唔通冇頭髮冇咁靚仔，就冇資格偷食？我非常同情王浩信，暖男無端端變賤男，唔通真係要兩公婆直播愛情動作片，或者宣誓先至信？如果我係王浩信，兜巴星你埋牆話晒人哋有個女，小朋友聽到呢啲傳聞會點諗？就算老竇攞埋奧斯卡影帝都補唔番
小三、小四、出租女友一街都係，驚另一半偷跳？咁就要睇大婆「食力」喇！拖住老公闢謠、一副「Yo！使乜驚！」嘅YoYo享有高度自治權，由大廳行到上大床，360度全方位食硬老公！先講副偈，36歲嘅佢仲Keep到C Cup身材、21吋蛇腰，零師奶味，同當年拍《四葉草》時一樣又Pure又True，完勝其他妹妹仔，乜嘢邪花都彈開啦，正如佢講過：「女人唔可以懶！」你估淨飲齋坐就索咩？佢好似打聖戰咁，泰拳、瑜伽、羽毛球等等乜都做，日日敷Mask，未計做家務同開工拍劇，一日24小時當48小時用！
派福利血流成河
為幸福而戰嘅YoYo日操夜操，操到班網民猛話睇到㷫合合，佢舊年仲同陳煒拍劇玩「SheShe吻」，親嘗「煒哥的味道」，夠晒重口味！佢哋之後仲拍住上，喺台慶跳埋肚皮舞，YoYo同煒哥比簡直冇得輸，連黃宗澤同馬國明都直豎拇指！王浩信就忍唔住晒命，開心Share幫老婆影嘅水着相，擺明有好嘢益街坊，網民狂呼睇到血流成河！
王浩信可以成年唔放假，專心拍戲拍到攞視帝，冇YoYo呢個大後盾點得？佢氹奶奶、湊女一樣掂，貼地慳家，應使得使，王浩信都講過送袋畀老婆，佢會面黑㗎，情願買樓畀佢仲實際！咪以為YoYo先係Final Boss，其實王浩信先係，有名你叫Signal Wong，即係「食腦王」，識揀老婆，就等於修身齊家治國平天下，所以你話揀老婆幾咁重要！
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|
