鬧市行人專用區噪音擾民近年成為社會問題，愈來愈多人聚集賣唱及播歌起舞，不少居民及商戶飽受滋擾，今年首八個月警方就收到逾千宗噪音投訴，有商戶在店舖前放下巨大隔音屏圖阻擋聲浪，亦有市民曾因噪音問題發生衝突，而藝人伍允龍（Philip）前晚（9日)就以身犯險，在廟街「賣唱」嘈到拆天，結果引來投訴並被警察「冚檔」！
技「驚」四座招人妒
有讀者爆料，Philip前在廟街拍無綫劇《兄弟》「賣唱」時嘈到拆天，飾演走音歌王的他在賣唱檔攤內突然技癢，搶咪高唱一Part《難為正邪定分界》！打慣功夫的他中氣十足聲如洪鐘，但唱功認真不敢恭維，高音位瘋狂走音，唱到一半已回不到氣，窒了一窒才繼續高歌。在旁的臨時演員都頂唔順掩實耳朵，難為Philip仍異常投入，紮行甫士舉咪大叫，猶如胖虎上身！
未知是其唱功太嚇人還是音量太大，有廟街街坊報警，警方到場後要求劇組停拍，連帶其他賣唱攤檔亦要休息一晚！Philip受東網訪時表示：「每次拍攝外景都有唔少街坊圍觀，大家覺得好有趣，想影相，今次亦一樣，可能因為咁令到附近一啲攤檔覺得阻住佢哋做生意所以報警，最後成條街都唔畀唱。」在美國長大的Philip首次在廟街賣唱，感覺得意，更自言很喜歡看袁詠儀的電影《新不了情》：「見到佢喺廟街唱歌，就覺得呢個文化好有趣，依家終於有機會試，感覺特別。（你唱得好誇張喎！）劇本要求係『唱好大聲同走音』，我盡力做，見到路人嘅反應，我就知已達到目標。」
朱晨麗笑夠投入
至於有份拍攝此劇的朱晨麗，雖然當時並不在場，但相信Philip一定是超級投入才被投訴，又笑對方外表成功融入廟街：「佢一定好投入咁去拍，令人哋唔覺得係拍緊戲，先會搵警察過嚟，做演員投入好，融入到個環境，應該要向佢學習，一定唱得好逼真，我都想聽吓，佢走音走到乜嘢地步，應該幾誇張！哈哈！」至於劇集監製林志華受訪時表示，該場戲尚未拍完，會向有關方面申請進行補拍。
懷舊文化 街知巷聞
廟街以油麻地天后廟為界，對出的廣場俗稱「榕樹頭」，由1920年代開始發展成大笪地式的休憩場地，帶動附近攤檔及歌檔盛行，更有「平民夜總會」之稱！時至今日，仍有人定期在廟街賣唱，成為香港懷舊文化，張艾嘉主演的電影《廟街皇后》、李克勤及梁漢文主演的劇集《廟街．媽．兄弟》亦以此為題。
每日傍晚，廟街路邊的攤檔便會開始營業，售賣物品包括服裝、茶具、玉器及成人用品等，既便宜又多元化。天后廟外亦有不少看相、算命的攤檔，有時還會有傳統粵劇表演，不少遊客慕名而來。
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|
