上月27日，翁靜晶與定慧寺官司終於有定案，法庭頒令定慧寺清盤，翁靜晶打了一場漂亮勝仗。
但其實一開始打官司，都要過好多心理關口。「我依家唔可以同任何人結婚，因為定慧寺官司我好大負擔，如果嫁畀任何人，會令嗰個人負擔都好大。呢件事係我搞出嚟，我要將啲錢畀番晒捐款人，骨灰畀番苦主，我自己嘅事唔想累人。」今年八月，翁靜晶接受《蘋果》時說。
「呢件事係我搞出嚟」，說的是召集信眾為定慧寺籌款一事。
翁靜晶憶述﹕「一開始定慧寺個尼姑（釋智定）對我講，話佢哋間廟日久失修，就嚟要冧，連電費都冇錢畀。尼姑對眼都盲嘞，因為佢睇唔到經書，又話冇錢食飯，講到咁可憐。而我係一個幾慳嘅人。我自己帶頭捐咗十萬蚊，仲喺fb呼籲大家去捐錢，短短三個月就籌到五百幾萬。」
後來發現有人挪用善款過奢華生活，令翁靜晶恍然大悟：「原來一副眼鏡要萬幾蚊，又坐Benz出入，仲同過兩個和尚結婚。嗰時我個十字路口就係，如果乜嘢都扮冇事發生走咗去，我喺佛教界就係一個好叻嘅人，幫人籌錢，德高望重，仲係大家都搶嘅財神。」
本來明明可以「合埋對眼」不再蹚進這淌渾水裡，但一位故人令翁靜晶改變決定。「籌款過程中，有一個梁姓嘅女人打畀我，叫我去佛教醫院臨終病房見一見佢，佢話﹕『翁律師，我睇到你嘅呼籲，呢個寺院真係需要你幫忙，你拉開個床頭，我冇力，入面有一大嚿嘢，係我畢生嘅儲蓄，我所有嘅錢八萬蚊，你攞去捐畀定慧寺』」原來對方只剩數日命。
翁靜晶稱：「我攞咗嗰筆錢捐畀定慧寺，過幾日佢就過咗身，呢件事其實係一個好大嘅動力，令我唔可以走咗去，因為我走咗去，佢嘅捐款就會落喺壞人手上，我冇辦法去還番呢個錢畀佢。佢臨死之前帶住一個咁嘅願望，係捐筆錢做一件好事，但我明知壞人係會攞走啲錢，嗰一刻我係決定咗唔可以走，於是我選擇咗行一條辛苦嘅路。」
翁靜晶凡事尋根究底，在追查定慧寺帳目期間，其實曾向香港多個佛教團體尋求協助，但得出嘅答案，令人失望，因為個個都怕惹禍上身。詳見另文。
「佢哋唔會出嚟發聲，因為佢哋搵到錢喇，上岸喇。有啲專業人士，佢哋已經做到唔想得罪人。我覺得我今日可以得到一切嘅嘢，都係香港大眾大家一齊努力而得到嘅，我唔覺得我要去保護自己嘅財富，或者去保護自己嘅名譽，而去違背咗自己嘅良心。」
但講到從政，翁靜晶興趣不大，「依家個立法會就真係冇用嘅，我唔會入去喇。你根本冇能力去推動任何嘅改革。自從立法會議員冇權推行私人法案之後，立法會對我嚟講係完全冇任何吸引力。你入去立法會，你只不過係一個Yes and No嘅一樣嘢，我覺得唔需要多一個橡皮圖章。」
講到令代議士廢武功，前任梁振英「功不可抹」。翁靜晶感謂：「梁振英本身我係認識佢，喺佢做特首之前，我都覺得呢個人衝勁有為嘅，亦對佢評價係幾好，但經過呢幾年入面，我對佢冇再抱有任何嘅希望，佢真係令香港人撕裂好大。」
「依家係林鄭上台，我就會咁樣睇，呢個係盲婚啞嫁嘅年代，你就算好唔鍾意表妹，但係阿爸阿媽一定要做娶表妹，你鍾意出面嘅阿Lucy你就娶唔到。咁你娶咗喇，表妹依家做咗你老婆喇，咁你得兩條路行，你就試吓表妹係咪咁差先，大家相處吓，得就得唔得先，另外一個做法就係憎到你死，日日同你對抗囉。」
「如果個表妹係賢良淑德嘅，雖然你唔鍾意佢都好啦，但佢冇咩做錯，咁你就要都要善待佢，睇表妹嘅能力範圍可以做到幾多嘢。」翁靜晶舉個例，「你起碼睇佢煮飯洗衫嗰part，民生問題做得好啲，咁都好過之前嗰個吖。之前嗰個乜都同你搞，乜都同你拗，我覺得嗰個真係比較差啲囉。」
記者：嵐山、馮國康、倩宜
攝錄：馮峰、卓振輝
攝影：陳俊強
【俠味道‧翁靜晶(1)】恩愛三十載之謎 翁靜晶點解叫劉師傅做細B？
http://bit.ly/2AnvNoz
【俠味道‧翁靜晶(2)】明知劉家良已有家室 翁靜晶：以前嘅社會好唔同
http://bit.ly/2jbxufo
【俠味道‧翁靜晶(3)】浪漫等如浪費 劉家良餵包餵到翁靜晶反面？
http://bit.ly/2kiuroY
【俠味道‧翁靜晶(4)】翁靜晶 劉家良戲假情真 張國榮原來係月老
http://bit.ly/2kkwDw3
【俠味道‧翁靜晶(5)】悲慘童年練就堅強個性 翁靜晶親述被虐經過
http://bit.ly/2zLBObq
【俠味道‧翁靜晶(6)】越南出世 翁靜晶點樣「攝罅」成為「香港人」？
http://bit.ly/2BxxcGd
【俠味道‧翁靜晶(7)】父母離異 翁靜晶9歲入貴族學校寄宿受虐：成身皮膚爛晒
http://bit.ly/2zO7sVT
【俠味道‧翁靜晶(8)】母親錫晒孻仔 翁靜晶14歲離家出走：你打死我
http://bit.ly/2A3xPeg
【俠味道‧翁靜晶(9)】《喝采》擔正有段故 翁靜晶讚哥哥係天才
http://bit.ly/2iVyB5V
【俠味道‧翁靜晶(10)】拉埋細佬賣汽水維生 翁靜晶：有腦㗎嘛！
http://bit.ly/2AuwuMU
【俠味道‧翁靜晶(11)】寄張相就做咗演員 翁靜晶：從來唔覺得自己靚
http://bit.ly/2imvrEf
【俠味道‧翁靜晶(12)】細訴與陳百強關係 難忘對方教Table manner
http://bit.ly/2BF7e3M
【俠味道‧翁靜晶(13)】對梁振英完全改觀 翁靜晶歎權貴為錢噤聲：唔想得罪人
http://bit.ly/2kxF7A0
【俠味道‧翁靜晶(14)】單挑定慧寺惡尼 佛門個個自保：你信佛咪搞咁多嘢
http://bit.ly/2jqUg2J
【俠味道‧翁靜晶(15)】仗義每多屠狗輩 市民自發眾籌幫手打官司
http://bit.ly/2BfYXa8
【俠味道‧翁靜晶(16)】「中共統戰部」恫嚇翁靜晶 撻朵都撻錯
http://bit.ly/2BIDoLS
更多娛聞，喺晒《娛果》
http://fb.com/appledailyent
|
鍾意就快D Share啦！
|
|
|
