視后田蕊妮與「無綫福將」歐陽震華（Bobby）同樣渾身是戲，但Bobby直認以為阿田好惡而害怕與對方拍檔，十年來「河水不犯井水」，在無綫50周年台慶劇《誇世代》才與「進化版」阿田合作，並在劇中頻頻鬧爆阿田，令她面呆兼眼凸！而阿田則直認在現實中亦是小女人。
田：田蕊妮 B：Bobby
十年進化先夠班
B：第一次合作，呢個時間啱啱好喎！
田：點解呀？即係早啲我係唔夠班嘅？
B：你唔係未夠班，係我驚我未夠班！
田：好嘢呀你前輩！
B：你同啱啱入TVB時比係進化咗好多，我睇番你十年前嗰套《蘭花刼》時係未進化嘅。
田：入咗TVB十年，十年前套劇同依家都好唔同，的確我自己都覺性格唔同咗，十年前可能仲有棱角，人長大咗，情緒上都有改善，可能因為咁連個樣都唔同啦，如果我真係Keep得咁好就好喇！
B：我初初都覺得你好惡！我唔出聲都畀人話惡，何況你？
田：咁你依家覺得呢？
B：比我想像中唔惡囉，早幾年我太太話，試吓同阿田合作？我都話：「好似好惡咁喎？」依家就進化好喇！
告別戇居階段
田：入TVB十年，Bobby係我遇着第一個男對手……
B：最肥？睇怕都係喇！點解我睇落肥呢，因為我骨細！我個人好精緻，但係肉多囉！
田：即係你切晒啲脂肪係鋼條身形？
B：我諗90磅左右！
田：咁多個對手之中，Bobby係最自然嘅。我同佢拍出嚟唔似演戲，好似真係兩個人傾緊，有血有肉嘅，我好鍾意呢種感覺，我拍完《誇世代》之後覺得唔夠，50集都唔夠，我希望可以拍20集，集中啲，成條線都係對手。
B：我哋都係鍾意留意對手，有啲演員淨係記自己對白。我唔會規定自己做乜，可能嗰個階段已經過咗啦，我訓練班時都會寫低晒：「反應：流第一滴眼淚。」
田：咁你都幾戇居喎！
B：係呀，我鍾意嗰個阿Sir咁教，佢話我係「笨鳥先飛」嗰類演員，自認冇乜資質，所以初時一諗到點做就寫低。
田：咁咪唔鬆化囉！
B：咁我經過呢幾十年嘅進化，就啱啱好進化到可以同阿田合作，所以幾開心呢！
反被吳業坤影響
B：對調靈魂30集，其實角色唔難，但矛盾位係幾大，阿田要幻想我係吳業坤。
田：其實唔使幻想架！你直情係吳業坤，無論眼神同行路動作都係扮佢，最初你話等吳業坤扮你，點知你反而畀佢影響咗。
B：即係啲形體動作？
田：我覺得Bobby係幾勁，佢有去Study吳業坤！吳業坤你好難同佢熟，加上佢好驚Bobby，而Bobby無形中做好多嘢，首先去同佢傾偈，相處好似Buddy，由佢眼神開始，因為佢大近視，所以平時同人講嘢都睩大隻眼，仲連行路姿勢都學埋！
B：真係架？我又真係唔覺喎！
田：係架，因為吳業坤個躉好壯，所以佢個重心落咗去個躉度，無意間會趷籮！你睇番套劇吖，你扮佢時個籮柚好趷架！所以都唔使點去幻想，佢根本係將吳業坤做咗出嚟。
做反派感染觀眾
田：今次做小女人，因為老公太強，所以習慣「熄機」，慢慢畀人覺得係蠢。其實幾好玩嘅，有時自己都入咗戲，會諗番其實呢個角色唔係幾啱我做，有冇人會信我係咁喎？實質生活上我又係咁嘅！所以盡量做番平時嘅我出嚟。
B：但實質生活上我又唔係咁喎。
田：試過拍完一場戲，可能我表情真係太呆，結果完咗Bobby都問我「我係咪好惡呀頭先？」
B：嗰場我都記得，一打十呀，佢仲話我好躁狂。
田：係囉，我仲有少少耳鳴！下下丹田出架，字字鏗鏘，耳膜都穿，但成件事係好恰到好處。所以我覺得Bobby仲有好多面未畀觀眾睇，只係觀眾鍾意睇佢格格笑，如果佢做反派或者感情豐富嘅戲，都會好感染觀眾。
B：我都好有興趣做吓反派，最緊要有血有肉，我都希望做畀你睇架，再合作啦，有機會嘅，我哋仲年輕！
邊個上台拎獎？
田：我對自己一向都有信心，演員冇自信係演唔到戲嘅，因為我喜歡演戲，無論有冇獎都咁演，所以我一直都答冇諗。其實我開始做演員時都未有頒獎禮，但係我一直都係咁演戲。
B：我就唔使問啦，我一直都有信心拎「飛躍進步獎」，因為我都咁多年冇拎獎，如果拎到「飛躍」就代表我有進步囉！
田：你今年應該拎到「新演員獎」！因為你大部分時間都係演吳業坤個角色，如果佢因為呢個角色拎獎，係咪應該由你上去拎呢？
B：梗係吳業坤上去拎
田：但係你演喎！咁佢咪好着數？
B：咁希望佢拎到獎可以帶我入去音樂界，我都想做吓新人！
田：唔好搞個樂壇喇，吳業坤去到樂壇已經搞到污煙瘴氣，全部女歌手都關佢事喇！
田蕊妮髮型：Ritz Lam＠Hair Corner
化妝：諺瞳.小白
----------------------------
東網巨星開咗ig喇，大家快啲follow
https://goo.gl/KGuo2N
|
鍾意就快D Share啦！
|
|
|