組合農夫近年喺大台嘅曝光率奇高，陸永同C君(鄭詩君)分開拍劇，轉個頭又會喺綜藝節目合體做主持，拍住嘟姐鄭裕玲做《Do姐再Shopping》，C君喺節目入面玩食字兼狂窒嘟姐鄭裕玲，有唔少觀眾話睇得好過癮。
查實C君出世嗰陣已經患有重型地中海貧血，每個月都要入院輸血，而佢喺14歲嗰年，曾經拍過宣傳片，嗰陣講到自己個病，佢話：「人哋個個放學可以去打波，我要返嚟(醫院)配血，真係幾煩，不過唔辛苦，唔返嚟輸血會死喎，咁梗係返嚟喇！」呢段短片噚日亦喺網上被瘋傳，唔少網民留言鼓勵！
今日亦都有周刊報道，C君喺訪問提到呢個病，佢話因為父母都有地中海貧血病源，結果遺傳咗俾佢，嗰陣嘅醫學唔係咁昌明，所以日日都要出入醫院打針，又成日去醫院輸血，好彩醫院方面好配合，因為每次去醫院輸血都要10個鐘，所以盡量揀啲唔使返學嘅日子，到咗O依家因為本身工作時間唔固定，所以安排可以彈性啲，如果情況許可，唔使4星期就返去輸血，而且仲可以約定下次覆診日子。
C君話就算自己要終生輸血，唔會覺得有呢個病覺得好辛苦，起碼可以做自己鍾意嘅嘢。C君喺訪問亦提到身世，原來喺4、5歲嘅時候，媽媽因為有外遇而同爸爸離婚，佢同爸爸相依為命咗幾年之後，爸爸識咗第二個女人，冇耐仲結埋婚，雖然爸爸已經離開咗，但係同C君同繼母嘅關係都好好，到O依家仲有聯絡。C君仲話知道生母已經有另一個家庭，不過佢話嗰陣年紀仲好細，已經忘記生母係乜嘢樣，所以點會嬲佢？
更多娛聞，喺晒《娛果》
http://fb.com/appledailyent
來源 source: http://hk.entertainment.appledaily.com
|
鍾意就快D Share啦！
|
|
|