文詠珊（Janice Man）轉攻內地市場後，工作接不停，難得聖誕節有假期，日前與男友吳啟楠（Carl）拍拖旅行，兼慶祝後日生日，未料在芬蘭轉機去聖彼得堡時，5件寄艙行李全失。冷到病的JM昨日凌晨在微博貼文，炮轟芬蘭航空公司不負責任，完全沒有提供協助，之後去買日用品時再險遭盜竊，今趟旅程可謂一波三折。
文詠珊趁着聖誕假期，加上周五是她29歲生日，日前和拍拖三年多的男友啟程到芬蘭欣賞北極光。抵埗後，JM還拖着隨身的旅行篋，開心拍片放社交網，未料24日在芬蘭轉機去俄羅斯聖彼得堡時，她和男友的5件寄艙行李全數遺失，心情由天堂跌進谷底，平安夜很不平安！
JM昨日凌晨在微博貼文寫道：「昨天從芬蘭轉機到聖彼得堡，我的5件行理全給芬蘭航空弄丟了。所有的禦寒衣物和生活用品都在行李中，未來的兩星期在北歐都不知道怎麼過度，而芬蘭航空只回覆一句『不清楚』，這是一個合理的回覆嗎？」
已由聖彼得堡折返芬蘭的JM，昨日接受《蘋果》電話訪問時嘆道：「我哋行程係由香港飛去芬蘭，然後由芬蘭轉去聖彼得堡，諗住玩兩日先返芬蘭睇北極光，就係喺呢程機，全部行李冇晒，一件都冇，芬蘭航空係一句回覆都冇，我哋仲喺機場滯留咗4、5個鐘，就係不停搵行李，但係都冇人理我哋。」
遭遇冷待
據JM透露，今次遺失行李不止她和男友，同機至少有8、9位乘客亦受影響，他們在行李輸送帶等不到行李都大吃一驚，齊齊去航空公司櫃枱查詢，但均不得要領，十分無助。JM說：「我哋噚晚咁啱喺街撞見番同機三個美國人，佢哋都話未搵得番（行李），但航空公司只係不停話『No Information』，又唔聽電話。」JM嬲爆謂：「我𠵱家只係得番一件手提行李，真係太過份，太誇張，我都好少會咁寫出嚟，但真係覺得好匪夷所思，追佢哋（航空公司）就表現好唔耐煩咁，一係就電話打唔通。」
JM又說，由於此行主要去欣賞北極光，怕冷的她大部份行李都是禦寒衣物，故失掉行李後，她要在聖彼得堡頻撲買衫及日用品。JM透露：「今次我準備咗全套full gear去，𠵱家冇晒，連帶去嘅糧食都冇晒，暖包又冇，呢度又買唔到，所以我已經凍到病咗，噚日先買番個篋，諗住嚟聖彼得堡玩兩日，點知變咗嚟買衫同日用品。」
險遇盜竊
不過，遺失行李逾48小時的JM，昨日由聖彼得堡飛回芬蘭前，終於在航空公司櫃位，聯絡上一位稱是負責行李的職員，對方指她的行李在芬蘭未有上機，果然，返回芬蘭的她終於取回5件行李。JM補充道：「唔見行李後仲有小插曲，冇晒啲行李之後，我哋即刻去買衫同埋日用品，其間我幾乎又俾人偷嘢，個背囊已經俾人打開咗一半，好彩發現得早。」她又說：「如果唔係發現到，連銀包同證件都冇埋就慘喇！」
採訪：小米
|
鍾意就快D Share啦！
|
|
|
