56歲嘅歐瑞偉，以前佢係陶總管（《尋秦記》），戇戇直直又好打得，對住滑頭嘅項少龍，完全招架不住。
陶總管其實叫陶方，歐瑞偉係「大歐」唔係區瑞強個區，英文名叫Jimmy。《尋秦記》已經係2001年之作，陶總管入咗行都成32年。資料顯示拍過100套劇，係100套，唔係100集。依家大家最熟悉嘅，都係KC、易先生、楊竹鑾呢幾個角色。可能佢本人都估唔到，一個麻甩佬，同另一個麻甩佬Terry(李偉健)跳手指舞會咁多人Like。
大家都知歐瑞偉做龍虎武師出身。有個行船爸爸，讀左派學校香島，讀書嗰陣已是體操好手，學校重點栽培，歐瑞偉就專攻跳馬。加上生得都算靚仔，走去做替身，化埋妝，做劉德華替身。嗰陣仲係八十年年代之初。講多次，係八十年代初。
嗰陣歐瑞偉月入三萬。
做龍虎武師做到月入三萬，仲係三十年前，但劉德華一份Form改寫咗歐瑞偉嘅人生。份form係無綫演員進修班報名表。就係咁陶總管就轉行做演員。畢業後第一個劇係85年呂良偉曾華倩版本《雪山飛狐》鬼見愁。
之後歐瑞偉一路都係拍古裝，形象正氣，常演忠義英雄。維基資料顯示，佢拍第二套劇《神劍魔刀》已經係第一男主角，《達摩》都係第二男主角——第一男主角係飾演達摩嘅呂良偉。87年，無綫開拍大型古裝劇《大運河》，梁朝偉劉青雲陳玉蓮曾華倩。歐瑞偉算係第二男主角，同飾演李世民嘅劉青雲平分春色。當時青雲配華倩，歐瑞偉襯出爐電視小姐冠軍王綺琴。抽到支好籤
《大運河》裡面，李世民得天下，虬髯客（梁朝偉）就帶住心愛嘅蘭陵公主陳玉蓮歸隱，李靖呢？由男主角跌咗落去第三男主角。拍到94年《Catwalk俏佳人》，更加連第三男主角都唔係，而係男配角。一次歐瑞偉接受專訪，講起這段一線變男配嘅日子，淡然謂：「其實呢行盡咗力都未必有成果，有啲人只出咗少少力，成果可以好多。呢啲就好睇有冇觀眾緣（略）最緊要將心比心同盡自己能力，唔好下下都等個天，或者怨天尤人點解唔俾機會我。」
就算到依家都一樣。有啲人入行幾廿年變晒老Pat Pat，但歐瑞偉拍處境劇，定時定候返工放工，但逢親KC與Terry同場，兩人定必提早返公司傾角色仲可以點玩：「我哋咁多年嚟都係咁，你睇落個角色好似好輕鬆，但唔係hea做，KC呢個角色真係落過苦功。」
95年歐瑞偉去大馬發展，娶埋當地一線花旦做老婆，婚後生一子一女。00年返無綫，已經係配角，甚至只是客串。去到04年拍《大唐雙龍傳》，又做李靖，但對手已由梁朝偉劉青雲變成林峯吳卓羲。但歐瑞偉繼續敬業樂業，嚴謹過嚴謹。
歐瑞偉提過一件小事，嗰陣係拍攝《回到三國》，歐瑞偉飾演關羽（執馬浚偉二攤…）：「成班男人戲等埋位，自然講吓鹹濕嘢，但我上咗妝，只能陪笑，唔可以搭嘴，因為嗰刻我就係關帝，要嚴肅，傳統規矩。」
| 歐瑞偉參與過超過一百套劇，產量超級多。 | | |
| | | |
| | | |
| | | |
|
鍾意就快D Share啦！
|
|
|
