之前有報導話林欣彤16年簽咗王祖藍後，工作量無咁多，搞到佢大屋搬細屋，有冇咁嘅事呀？Mag說：「都唔關事，我之前住大啲嘅屋其實係同幾個女仔一齊住，但發現其實都唔需要住咁大間屋，同埋因為某啲原因分別搬離咗嗰區，咁不如自己一個帶埋兩隻狗仔住番細啲，又慳啲錢，同埋而家住得近番屋企人好多，所以其實唔係好關事。」Mag嘅精神比起幾年前飽滿，狀態好fit，似乎已「重生」，新歌《忍》派埋台，睇嚟佢已ready回歸樂壇！「一直以嚟，除咗有一段時間真係唱唔到歌之外，其實無時無刻我都已經ready可以唱好多好歌俾大家聽，有一樣嘢好感動，就係前排可能我拍緊劇，又或者有啲時間喺音樂上無咁活躍，但係我嘅樂迷歌迷都依然無時無刻咁等緊我，所以其中一個一定要繼續唱歌，要堅持落去嘅原因都係因為佢哋！」
如果俾佢揀，仲希唔希望被稱呼為「小巨肺」？佢話：「呢個名有啲壓力，同埋好搞笑，譬如你介紹我係「小巨肺」，但我唱首好柔情嘅歌，係好搞笑，但我覺得無所謂，大家點樣稱呼都無所謂，你哋覺得如果咁樣叫我係親切啲，我又唔拘！」咁唔知Mag又有冇後悔入行？「我有問過自己，但我諗揀一百次都係會入行，因為雖然條路係難行，但因為可以成就咁多嘅嘢，同埋可以種嘅果其實好大，所以先咁難行，我覺得所有嘢都係值得。」
撰文：海 山
攝影：黃志明
錄影：葉志明
髮型：Terry yeung @corner
服裝提供：Rococo
場地提供：草民café
來源 source: http://nextplus.nextmedia.com
|
鍾意就快D Share啦！
|
|
|
