熱爆娛樂: 【閃耀人生女人心(番外篇)】指靚靚直啪嘞常闖禍張智霖：我想掃枱講粗口 _

2018年2月23日星期五

【閃耀人生女人心(番外篇)】指靚靚直啪嘞常闖禍張智霖：我想掃枱講粗口 __,閃耀人生女人心,袁詠儀,靚靚,張智霖,

袁詠儀最近接受《蘋果》女人心系列連載式專訪，講咗唔少老公張智霖（Chilam）同囝囝張慕童（魔童）嘅嘢，佢老公Chilam日日都有追嚟睇，喺呢個訪問結束前，我哋就搵佢講下感受，兼回應一下老婆係訪問入面對佢嘅「指控」。

衣着求其唔打扮

「如果我呢個嘜頭，再着得好Dress Up呢！人哋會覺得你好扮嘢㗎！即係要Down To Earth啲囉，如果我唔係咁嘅樣，我會Dress Up囉！同埋如果我Dress Up佢(指靚靚)應該要好擔心先啱！」

教仔太寬鬆

「時常都話毋忘初衷呀嘛！我哋時常都話只想小朋友健康快樂地成長，咁我真係毋忘初衷喎。可能有時你會聽身邊啲家長BLA BLA BLA，會比較會令你會對自己個小朋友有好多要求，某程度上我覺得會磨走咗一種好似稜角嘅Talent，我覺得唔應該咁嘅。除此之外話我教育好寬鬆，呢件事我完全唔否認，因為我地都知道，生活係幾咁困難亦舒曾經講過，小朋友細個你唔寵佢，到大個已經有咁多艱苦係面前，咁點解當佢仲係小朋友時候，你唔對佢好啲呢？」

魔童換媽咪

「無嚇親，其實係一種因果嚟嘅。佢（魔童）有咁嘅諗法，但我唔一定咁樣做㗎嘛！作為一個好似旁觀者嘅角色，見到有咁嘅事情發生係「因」，自然會有咁嘅結果出現。我當然有試過嘗試去做一個潤滑嘅角色，但係一個命嚟㗎我覺得，我個仔嘅命運，就係有一個好Challenging嘅媽媽，咁佢就必須要去面對，唔係每個人嘅媽媽都一定係溫柔，爸爸就一定係勤勞㗎嘛。」

產後抑鬱亂發脾氣

「其實唔係嗰段時間啦，我覺得佢一向都係咁！你話佢而家唔係咁咩？又唔係喎！我覺得唔係產前定產後抑鬱症問題，係大家要學點樣去包容對方，每日大家都要面對同磨合，我覺得冇人係完美嘅，我知自己亦唔係。你每一日都要去學習同人相處，因為每個人必定有佢嘅弱點，你就係要去Deal With佢嘅缺點。」

張智霖 = 聖人 = 零犯錯

「唔係咁樣嘅，點會冇錯吖！每日都有大大小小嘅錯！我覺得佢自己理虧咋嘛！哈哈哈哈哈！我就覺得自己時常都會做錯嘢嘅！可能拍戲時對某啲工作人員講嘢，都會問自己今日語氣係咪重咗呢？時常都會反省自己。我哋Suppose係一個Partner去面對人生，所以我唔係喺你面前都扮住嘢！我唔可以咁樣！應該一齊去一個方向㗎嘛！我係咁諗囉！所以佢會覺得點解你好似好有道理咁！」

靚靚易得罪人

「講嘢唔經大腦，係咪一個優點嚟㗎？你需唔需要理下人嘅感受呢？㗎喺電視台我都好想講粗口，可唔可以㗎？我都好直啪嘞㗎！但你要明白一點就係，你對某一啲人直啪嘞，但係你對某啲你尊敬嘅人會唔會咁直啪嘞呢？呢樣好值得三思喎！有啲嘢過濾咗先去講，定係直啪嘞去講呢？你鍾意直啪嘞可以繼續直啪嘞！你要闖嘅禍，你就繼續去闖，我唔覺得係要去改變對方嘅！某程度上我仍然欣賞佢嘅直啪嘞！」

「投訴」張智霖爛玩冇節制

「因為大家對生命嘅睇法唔一樣。我覺得人生苦短，有好多事原來你唔做，之後就唔知有冇機會做㗎喇！瞓？第時好多時間可以比你瞓不如Play Hard Work Hard比較合理啲！」

淨係去自己朋友聚會準時

「唔會唔會！因為係主場同唔主場嘅分別吖嘛！即係主場嘅時候咪盡量去做一個主人角色囉！但如果我係一個客人時，唔可以喧賓奪主㗎嘛！我可能會靜啲，可能會比其他人發現，可能冇咁Entertaining，可能呢個係佢感覺」

回應完老婆袁詠儀嘅「指控」之後，張智霖就發表佢終極愛妻宣言：「老老實實佢喺我眼中係冇乜缺點，因為你哋所形容嘅缺點，或者佢自己認為嘅缺點，都只不過係一個人嘅性格嚟，我唔覺得要去改變，大家喺呢一刻都仍然有個熱情去維持呢個家庭，我覺得已經係最好不過。」

採訪：陳月媚

攝影：倩宜

攝錄：廖達燊

【閃耀人生女人心(13)】為H字頭包包瘋狂靚靚分享美魔女護膚絕技

http://bit.ly/2sHqTR6

【閃耀人生女人心(12)】唔怕向華勝最驚哥哥袁詠儀後悔推搪梅姐飯局

http://bit.ly/2CayqLQ

【閃耀人生女人心(11)】同成龍星爺傳不和靚靚認儍親解《國產凌凌漆》內幕

http://bit.ly/2EINDBO

【閃耀人生女人心(10)】靚靚帶隊重遊小學自爆13歲初戀錫錫點到即止

http://bit.ly/2Fg97ad

【閃耀人生女人心(9)】爸爸嗜賭曾寄人籬下袁詠儀感謝母親管教嚴

http://bit.ly/2EDOMul

【閃耀人生女人心(8)】警察宿舍出世成長袁詠儀夾埋阿哥打鄰居女孩

http://bit.ly/2o7QDky

【閃耀人生女人心(7)】唔識語言藝術得罪人靚靚被雪成就影后路

http://bit.ly/2F5KCw7

【閃耀人生女人心(6)】經歷選港姐勾心鬥角靚靚一心攞亞軍：我係張曼玉

http://bit.ly/2EEyLaP

【閃耀人生女人心(5)】老婆坐月Chilam照蒲靚靚產後抑鬱險離婚

http://bit.ly/2HdEqmD

【閃耀人生女人心(4)】坦認女追男靚靚呻俾老公食住：張智霖係唔會錯㗎！

http://bit.ly/2H9XvWy

【閃耀人生女人心(3)】狂造人望追多個女靚靚人工受孕：我卵子已老

http://bit.ly/2CfW45g

【閃耀人生女人心(2)】懷疑魔童自閉過度活躍靚靚陪睇心理醫生原來係...

http://bit.ly/2EinZDx

【閃耀人生女人心(1)】靚靚管教太嚴愛操控魔童：我想換個新媽咪

http://bit.ly/2EkPJY1

精選娛聞，喺晒《娛果》

http://fb.com/appledailyent

	張智霖親身回應老婆袁詠儀嘅「指控」。	袁詠儀個系列式專訪，Chilam話自己都有追睇。
靚靚係訪問入面話無咗老公佢會生活唔到。	Chilam聽完就笑笑口咁話：「你哋唔好信佢講呀！」	講到靚靚說話太直唔經大腦，Chilam個樣就變得嬲嬲地，仲話：「駛唔駛理下人感受？」
「我都會有缺點㗎！唔通係哈利路亞咩！」－張智霖	靚靚投訴Chilam唔會打扮。	Chilam就解釋如果佢呢個嘜頭，再打扮下就會俾人覺得佢扮嘢。
寵妻狂魔張智霖，話老婆袁詠儀係佢眼中根本零缺點！