掃呢頁CODE去手機

2018年3月11日 星期日

娛刺撈飯:唐文龍劏房肉搏抗通脹 踢走美人拮大髀 __,唐文龍,

唐文龍堂眉真係冇得頂!HiAuntieUncle!我叫唐文眉,我大佬就係喺《溏心風暴3》做賤男搞良家婦女陳敏之,喺張床翻雲覆雨搖啊搖,都未搖到外婆橋, ...


唐文龍堂眉真係冇得頂!


Hi Auntie Uncle!我叫唐文眉,我大佬就係喺《溏心風暴3》做賤男搞良家婦女陳敏之,喺張床翻雲覆雨搖啊搖,都未搖到外婆橋,就已經搖到班港女同師奶流晒口水嘅唐文龍!背妻偷食歎正菜,呢啲齋聽都打冷震嘅行為,竟然令我大佬紅咗,紅到全城網民畀埋個朵我叫唐文眉,呢鋪仲唔係吐氣揚眉?

個個話大佬似羅莽或Hugh Jackman嘅狼人,由香港數到去荷里活,唔係荷李活道,係Hollywood呀!你話我係咪威先?今次我要出場,因為同大佬做咗兄弟48年,有乜我唔知?真係睇住佢大,我講嘅大,係「大鑊」呀!喺紐約讀完個時裝博士返嚟,個個月Un Un腳𢭃三萬幾,爭啲做埋理工大學教授,但為咗做明星乜都放棄。出碟出到間唱片公司都執埋,轉去拍戲撈唔起,人工得番四千幾,千八蚊劏房呎數得七十幾,碟頭飯食唔起,長期快餐乾啃,唔敢叫餐飲,只為慳番三個幾,大佬唔頭痕就奇!

偷嗒咪神唔認數

奇就奇在,可能佢睇得史泰龍套《Rocky》多,嗰份正能量去到汕尾以南!人哋去「做尖」,大佬當劏房同公園係「尖窿」自學打拳操肌,依家震幾吓波已經搞到港女嘩嘩聲,十幾廿年前就個個媽媽聲,話係頭腦簡單,四肢發達嘅大舊衰!大隻佬都有叻仔,史泰龍IQ都拍得住霍金有160啦,可惜我大佬EQ 仲高過IQ,以前為兩餐焗騷肌,被踩波大冇腦玩HeHe,連老竇都問佢係咪唔吼女人除!冇錢冇女,唔通Share碟頭飯、捽手仔行公園吸靈氣又一Day咩?

講開女,我大佬一直人性克服獸性!同陳少霞拍拖六年,師傅話八字唔夾而分手!如果係真愛,梗係不愛江山愛美人,但五窮六絕時,唔到你唔信,我大佬都認迷信,唔想累人累物,好似之後同個空姐女友七年都係得個「拮」,即係周身冇蚊日日拮大髀呀!最後狠心一刀切,情願唔要美人,獨自落鑊打江山!早排話佢同億萬千金、咪神黃文意拍拖搞父女戀,佢唔認都係怕畀人話食軟飯!

奶粉罐塞錢救兄弟

與其話我大佬似羅莽,倒不如話佢似王小虎,一身好武功都係長期街頭訓練,同樣超有義氣!佢一好景,就打個金牌畀「沙煲兄弟」曹永廉報恩,見同自己傳過HeHe嘅劉永健唔掂, 就將堆錢塞落奶粉罐話請飲奶喎!

雖然我大佬好景唔使再住劏房,但好睇唔好食呀!佢同全港市民一樣,都要諗計抗通脹,早排統計處話有接近21萬人住劏房,就知個市有幾好唔好話月入過萬,好多月入四萬都係咁住,人工加劏房租金一樣加,求過於供,劏房閒閒哋至少八千,想平啲?廁所煮公仔麵囉,廚廁客睡四合一添!我大佬呢個都市悲歌系列,係唔少港人寫照,尤其喺呢個胡亂派糖、有錢都唔識使嘅香港地生活,有得住都好過瞓街,住劏房唔係醜事,「斗室有限,我願無窮」,有呼吸就有希望,劏房都會出英雄呀!

----------------------------

東網巨星開咗ig喇,大家快啲follow

https://goo.gl/KGuo2N


來源 source: http://hk.on.cc
鍾意就快D Share啦!