31歲日本女星石原聰美最近成為新聞人物，唔止威過同門師姐深田恭子及綾瀨遙為HORIPRO事務所拍廣告招幕新人，佢仲被爆新戀情，發現偕IT企業SHOWROOM嘅30歲社長前田裕二同遊沖繩斷正，當消息曝光後，有指石原聰美形象大跌，工作量隨時大受影響。
石原聰美同山下智久合演《朝5晚9》盛傳撻着，曾有報道指兩人會拉埋天窗，點知男方早前搭上索模Niki去夏威夷甜蜜度假，石原聰美都唔執輸，上月22日孖住前田裕二現身沖繩石垣島，翌日再到竹富島入住當地高級度假酒店，共度二人世界。
石原聰美同拜金女星紗榮子（SAEKO）拍完《朝5晚9》成為好友，曾有指SAEKO為石原介紹有米男性加以撮合，如今石原果然釣得金龜，仲似乎大有機會嫁入豪門做闊太，不過廣大網民認為佢戀上前田裕二明顯只係向錢看，仲有媒體指，石原因拜金指控破壞形象，相信會嚇走廣告商及會工作量大減，話唔定仲會結婚引退。
來源 source: http://hk.entertainment.appledaily.com
|
鍾意就快D Share啦！
|
|
|
