藝人魏焌皓與「十優港姐」麥明詩（Louisa）去年在無綫劇《使徒行者2》結緣飾演情侶，可惜戲外卻傳出二人在內地為此劇拍外景期間，女方遭男方強吻，Louisa憤而向高層投訴，才驚爆大隻仔「花底」，遭多位女藝員投訴「行為不檢」。無綫有感事態嚴重，將他炒魷。不過，魏焌皓對事件堅稱「一定冇！」，並表示對指控「一頭霧水」。
除了強吻麥明詩事件外，據可靠消息透露，事件還另有內情，指魏焌皓曾遭多位女藝員投訴並拒絕再合作，令不少監製都不肯起用他，此事上報到無綫管理層，無綫有感荷里活「#Me Too」反性侵運動席捲全球，對旗下職藝員之紀律亦十分重視，為了不想再發生令女藝員受傷害事件，無綫決定跟魏焌皓提早一年解約。
擁有40吋胸肌的魏焌皓，行內有「大隻仔」之稱，憑其外形冧盡不少女生，更有傳他兩年內「速食」15名𡃁模和花旦，相當花弗。入行十年的他，於《On Call 36小時》演出受注視，至去年受無綫重用，安排參演由苗僑偉、陳豪、袁偉豪、黃翠如和麥明詩等演出的重頭劇《使徒行者2》，以為憑此劇可再上位，卻因不當行為，自毁前程。
魏：一頭霧水！
這宗「強吻事件」發生於去年，劇中Louisa和魏焌皓飾演情侶，但戲外並不投緣，有指男方私下常借故約會，女方並不受落，更有劇組人員爆料指Louisa當時很抗拒魏焌皓，每次會搵埋同劇的黃翠如及袁偉豪做擋箭牌。及後二人到內地為《使2》開工期間，卻發生「強吻事件」，女方不滿並向高層投訴，魏焌皓即被「照肺」，最後更提前炒魷收場。
魏焌皓對外稱雖有聽聞「強吻傳聞」，惟記者昨日致電他了解有關多位女藝員投訴他「行為不檢」，他即說：「冇聽過喎！（即係唔係第一次？）吓……聽到都一頭霧水。（有冇強吻及追求過麥明詩？）一定冇！（點解有此傳聞？）我都唔清楚，我之前都有傳過訊息畀佢，同佢講，一啲唔真實嘅嘢，希望唔會喺佢把口講出嚟！希望大家互相尊重，唔好有造謠者！但係佢冇覆我。（形象受影響？）我冇諗咁多，只想拍戲，唔想搞是搞非。」又指公司有跟他談及此事，但只是關心他，並坦承已離開無綫半個月，本來還有一年合約未完，但公司要求提前完約，至於原因，他說：「唔知喎！（公司冇解釋？）真係冇講原因。」
麥：唔想引起網絡公審
至於昨晚在apm舉行的《＃後生仔傾吓偈》100集Gathering活動中，曾就年少時遭性侵而發言的Louisa亦有亮相，問她拍《使2》時遭魏焌皓「強吻」一事，她說：「我有留意報道，因為公司有指引，加上新聞指名道姓，唔想講嘅嘢引來冇根據嘅揣測，加上我一貫宗旨，唔想引起網絡公審。（二人合作愉快？）成個劇組都合作得好好，觀眾好鍾意我哋呢條感情線。（知佢離咗巢？）睇新聞先知，每年都有同事離開去其他地方發展，嘗試唔同嘢都好，希望佢順利。」而無綫助理總經理樂易玲則表示不回應事件。另外，同劇的袁偉豪昨晚接受訪問時說：「我唔覺佢有搵我同翠如做擋箭牌喎！唔覺得佢哋有異樣。」
更多新聞，請瀏覽東方日報網頁：
http://orientaldaily.on.cc/
|
鍾意就快D Share啦！
|
|
|
