梁詠琪（GiGi）前晚假紅館舉行尾場「好時辰世界巡迴演唱會」，好友楊采妮、金培達和媽咪、谷祖琳、陳少琪、黎芷珊等睇騷，老公Sergio帶囡囡Sofia繼續撐場，兩父女現身時觀眾拍手起哄。當GiGi唱出作給囡囡的歌曲《My Little Sofia》時，螢幕播放家庭生活片段，GiGi讚囡囡是女神又靚又索：「女神帶畀我好多歡樂，我好開心，但好攰，湊女攰過返工。」
42歲趕造人
GiGi唱出《花火》，透露要悼念剛離世的上海歌迷棗子，她強忍淚水說：「我知你聽緊呢首歌，將呢首歌送畀你，呢20年我好似一架火車嘅車長，有人上車，中途亦有人落車，有人之後先上車。每個粉絲對我都好重要，唔希望失去任何一個，希望每一位都身體健康。」
完騷後GiGi出席慶功宴，提到三歲囡囡連續兩晚睇騷，GiGi大爆囡囡心情亢奮，返家後還要聽兒歌不願睡：「佢喺鏡頭前好怕醜，其實本身好奔放，成日學我唱歌。」為了今次巡唱，GiGi花了兩年時間籌備和演出，42歲的她坦言要向老公交人兼趕造人：「我要支持埋老公嘅生意先可以休息，好好哋造人。生完第二胎之後，再諗開演唱會part2嘅問題。」
悼離世粉絲
見到觀眾反應熱情，GiGi表示很開心：「令我好powerful，其實兩場都好滿意，感動地方都唔同。」提到離世的粉絲，她感觸地說：「今日先知有上海fans原本想嚟睇騷，但前一晚病逝，佢跟咗我好多年，每場騷都有睇，聽到呢個消息真係好心噏，我喺台上係真心講，好珍惜每個歌迷，真係一個都不能少。」
GiGi更感謝30多位親友捧場，其中有年逾70歲的長輩，她說：「咁大年紀都嚟睇騷，佢去到後台，我見到佢都忍唔住喊，因為好有心。」
採訪：羅慧敏
攝影：仇志德
|
鍾意就快D Share啦！
|
|
|
