【18:51更新】加入警方回應
紅VAN當交通燈冇到？一架據報準備收工的紅頂小巴，昨晨六點幾沿西環山市街南行駛至吉席街交界時，發生離晒大譜嘅意外。據讀者刁先生提供嘅車CAM影片，當時交通燈明明仍是紅燈，但紅VAN唔知點解冇收油，竟高速猛撞向停在燈口前的七人車的車尾將佢推前，七人車被撞到出煙，連車牌都甩埋，小巴意外後卻冇即刻停車，仲衝前咗成一百米先停車。刁先生坦言覺得「好離譜、好危險」，希望警方徹查意外原因。
刁先生話，昨日(24日)早上6點幾佢駕駛自己部裝咗車cam嘅電單車，在西環沿西環山市街南行，駛至吉席街嘅交界時啱啱係紅燈，佢於是停喺慢線等轉綠燈。點知呢個時候，右邊快線突然傳來巨響及碎玻璃的聲音。刁先生見到有小架紅頂VAN仔衝紅燈，猛撞原本停喺快線燈位前方嘅七人車，衝力之大將架七人車推前咗十幾米。
根據刁先生所見以及佢車CAM嘅錄像，當時架七人車被撞至出煙，車尾擋風玻璃全碎，車牌都甩埋。但刁先生認為最離譜嘅係，架小巴撞車後竟然唔停車，繼續高速向前走。刁先生其後按綠燈繼續駕電單車沿山市街前行，依稀見到右邊被撞七人車內有個女司機，但她應該仍然清醒。刁先生向前行駛咗成一百米，先終於見到剛剛引起車禍嘅紅頂小巴停咗係路邊，小巴車頭擋風玻璃碎咗，但小巴司機傷勢同樣睇唔清。刁先生話，接受唔到架紅VAN咁樣衝紅燈，認為非常危險。不過佢亦都諗，會唔會係司機本身病發或是因其他因素，先至會咁樣亂駕駛呢？希望警方可徹查。據了解，昨日呢宗意外中，小巴司機、七人車女司機以及七人車上13歲男童全部都受傷，需要送院治理，好彩傷勢唔嚴重，警方仲調緊意外嘅原因。
警方發言人則回應指，昨日上午約6時46分，一輛私家車及一輛小巴先後沿山市街往石山街方向行駛。當駛至近吉席街，據報小巴與私家車相撞。私家車47歲姓劉女司機、私家車上13歲姓廖男童、以及小巴55歲姓李男司機受傷，三人清醒送瑪麗醫院治理。案件交由港島總區交通部意外調查隊跟進調查，暫時無人被捕。警方呼籲任何人如目睹意外發生或有任何資料提供，請致電36606800與調查人員聯絡。
你敢爆，我敢獎！ 即Call《蘋果》24小時爆相爆片熱線：63836568
| 紅VAN在西環衝紅燈猛撞前方七人車，七人車被推前及遭撞至車牌都甩埋，目擊者稱好離譜。（讀者刁先生提供） | | |
|
鍾意就快D Share啦！
|
|
|
