薛家燕「不計成本」娶新抱！除了昨晚於洲際酒店筵開53圍外，她與新娘身上的金器、鑽飾、翡翠約值千萬元，日間一對新人向長輩跪地斟茶出動金杯金壺，加上她早前贈子價值2,000萬豪宅，過大禮時又送「家傳之寶」給新抱，連同昨晚的婚宴及布置雜項，保守估計開支約3,000萬，派頭十足！
兒子石耀庭與女友陳素怡昨日拉埋天窗，榮升新奶奶的薛家燕為求令兒媳留下難忘的回憶，除有小量婚禮贊助外，她傾盡心力及銀彈，昨日與新抱一樣悉心打扮，新奶奶更行頭十足，佩戴的翡翠鑽飾、手鈪及戒指，雍容華貴珠光寶氣。
奶奶新娘齊齊鬥閃
新娘其中一對龍鳳鈪猶如「流星錘」般，加上戴着的六隻「一串金豬」及大量金飾，以及薛家燕的翡翠鑽飾與金器，兩人的行頭近千萬，閃爆全場！石耀庭接新娘時則跟足傳統「踢轎門」，又向太太雙膝下跪送花。
據悉，薛家燕當知道兒子有意成家，已大手筆送出一個市值2,000萬的西半山豪宅單位作愛巢，過大禮時又將一套婆婆傳落的家傳翡翠首飾，包括吊墜及耳環送給新抱作禮物。薛家燕與一對新人受訪時，被追問大批首飾的價錢，她只淡然說：「做奶奶最緊要開心，我冇留意數字。」石耀庭則補充說：「總之係一個好靚嘅數字。（媽咪畀錢？）唔好講到我咁冇用啦，我有付出㗎！」新娘被問到身上首飾是否很重，她笑說：「係有啲重，但都OK嘅。」
爆阿仔得一圍酒
婚宴上，奶奶與新娘換足五套靚衫，相識滿天下的薛家燕更自爆：「真係唔好意思，我個仔今晚得一圍咋！」上台致詞時，她再提起兒子只得一圍酒席：「所以佢周圍同人介紹自己係Jackson，驚人哋唔知佢係邊個。」令台下笑聲雷動。不過，新人於周末會再舉行派對與友人慶祝，對於爸爸昨晚未有亮相，石耀庭表示會約對方食飯。
當被問到全日最感動的時刻，薛家燕眼濕濕說：「今朝佢哋斟茶畀我都已經好感觸，終於等到今日喇！下午佢哋簽字宣讀誓詞，我都喜極而泣，我叫自己控制情緒，不過見到親家喊緊，可能做父母都係咁，對仔女長大成人好有感覺。（有乜訓示畀佢哋？）對個仔講最緊要錫太太，兩公婆要忍讓。（想快啲抱孫？）你哋都周圍講緊。」石耀庭即說：「我會努力，想生一、兩個，但都要為事業努力。」
晚宴前已兩度落淚的薛家燕，入席後依然開心「淚不停」，多次落淚，一對新人上台致詞時，新郎哥亦忍不住喊，要身邊太太幫手抹淚，場面感人！
更多新聞，請瀏覽東方日報網頁：
http://orientaldaily.on.cc/
|
鍾意就快D Share啦！
|
|
|
