黎姿（GiGi）噚日以老闆身份到尖沙嘴為旗下醫學美容旗艦店舉行揭幕禮，除好友張可頤、林保怡、向海嵐、伍詠薇同張晉到賀，曾合拍電影《古惑仔》系列嘅鄭伊健同林曉峰更以神秘嘉賓身份現身，黎姿激動到眼泛淚光話：「呢兩個真係請都請唔到，唔好要我喊」
自胞弟黎嬰發生車禍後，黎姿代弟打理公司，到今日發展到上市，黎姿致辭時感慨話，自己從人手管理到會計財務學到好多知識，亦希望做到良心企業醫學美容：「我要特別感激身邊兩位重要人，第一個係我細佬，因為佢開始咗呢個醫學美容平台，畀我發揮創造自己空間。第二個係我老公，佢畀咗好多自由空間我去發揮，發展今日更好嘅GiGi。」
向海嵐后冠放保險箱
單拖現身嘅張晉指老婆蔡少芬有工作在身，佢笑住話自從識到太太至識得護膚；前港姐向海嵐對於楊婉儀抵押后冠話：「有留意新聞，但冇聯絡。唔覺得可惜，后冠一直俾人感覺唔值錢，我當年就話值160萬，自己一直將后冠放保險箱，其實抵押后冠就好似大家抵押物業咁，唔需要特別去睇。」
撰文：馮仁昭
|
鍾意就快D Share啦！
|
|
|
