歌手傅珮嘉（Maggie）今日上電台宣傳最新慘情歌《絕望元年》，甫見記者即急不及待分享於日本屋久島拍攝MV時遇到的靈異事！Maggie憶述期間仍心有餘悸，更向記者展示靈異照：「呢個地方又稱『幽靈公主森林』，因為宮崎駿套《幽靈公主》都喺呢度取景，另一日就去咗間歷史悠久嘅民宿，個屋主好古怪，話咩都唔可以掂，唔可以掂啲畫，咁當地導遊就同我哋講，如果上網Search個畫家名係邪教名，係有個組織。喺間屋入面我就已經好唔舒服，不過我對呢啲嘢唔敏感嘅，但後尾影咗張相，一睇我就話係撞鬼囉！（畀靈異相畀記者睇）咁啱有個人樣喺度，眼、耳、口、鼻又齊蔭，成個凶靈咁！」
畀老公笑
而相中的確可隱約見到Maggie頭頂對上有個奇怪小朋友「人樣」，隔籬更疑似有「另一隻」，她續話平時睇鬼片都驚到瞓唔着：「當晚收到相老公都笑我，就連經理人都話冇事，但我好肯定嗰度係塊鏡，冇其他嘢！」當記者叫Maggie將相刪除時，她本來想即刻照做，但下一秒就無奈笑話：「已經印咗喺隻碟入面！」
突然想喊
Maggie表示沒有住進其民宿，不過拍攝MV前一日，就有兩名當地導遊先「勇闖」布置場景：「佢哋都話唔敢瞓，仲話聽到啲聲！」她又稱拍攝期間突然見到屋內橫樑上有一比一的人形空心模型，旁邊更有用白布遮蓋住的「藝術品」，不過就唔夠膽去查明「真相」，大感恐怖！懷疑「撞鬼」的Maggie為證明真有其事，仲拎出「證據」：「MV入面有兩幕要喊，當大家都以為我係聽到隻歌而做戲，但係我係突然嗰刻好想喊！真係解釋唔到。」她再補充屋主另一「規矩」是不能讓女生去廁所：「好彩呢方面我好忍得，忍咗一日。」
感謝粉絲
此外講回新歌，Maggie開心話新歌推出後收到好多回響，有不少Fans都幫手Share出去：「佢哋對新歌好有考究，依家出廣東歌好啱，一首首出佢哋會好Detail去研究。」
----------------------------
東網巨星開咗ig喇，大家快啲follow
https://bit.ly/2JjSVcr
|
鍾意就快D Share啦！
|
|
|
