佘詩曼昨日在ifc出席護膚品牌開幕活動，同場還有劉嘉玲、徐子淇及韓星宋慧喬等，可謂美女雲集。阿佘因人氣內地劇《延禧攻略》爆紅，不過近日有指她以「開心價」200萬人民幣接拍，比女主角吳謹言收500萬人民幣酬勞少一半有多。對此傳言，阿佘回應：「一個話題咁hit，當中有真有假，有褒有貶。自己聽完笑吓就算，我諗起高貴妃一句對白『呢件事幾荒謬都好，有人信就當係真。』唔使解釋咁多。」而近日《延禧》監製于正亦公開澄清：「我們的總演員費是2,400萬，但佘詩曼不是傳言的200萬，吳謹言更不是500萬，佘詩曼片酬是所有演員中最高的。」
爆紅工作量增
現在人人都稱阿佘做「嫻妃」，她說：「噚晚搭夜機返港，送餐時收到張卡，寫住『嫻妃娘娘，完餐後可否同後宮小主影相？』你話大家幾入戲！」她透露因《延禧》多了工作，問到會否再拍宮廷劇？阿佘大賣關子：「吊吓你哋癮先。」有傳《延禧》開續集，她笑說：「唔知，好彩我冇死啫。」
談到演「袁春望」的王茂蕾被網民鬧爆，阿佘指：「證明觀眾好投入。」至於女主角吳謹言被央視狠批耍大牌，她就幫口：「有聽聞，唔知詳情，佢道咗歉啦，我平時接觸佢係好nice。」
爆偉仔怕拍劇
同場的嘉玲透露梁朝偉之前推劇因由：「偉仔因為以前喺TVB拍劇太辛苦，𠵱家對拍劇恐懼，佢連真人騷都推，話有錢冇命享。其實乾隆個劇幾好，我都有慫恿佢拍，不過佢淨係鍾意拍電影，話拍劇太多對白攞佢命喎。」談到偉仔之前央求她陪睇紅葉，嘉玲笑說：「唔係央求，因為我好鍾意工作同好多朋友，佢就鍾意寧靜鄉村生活，不過我最後都答應陪佢。」
採訪︰黃曉妍、梁展雯
攝影︰葉君海、陳俊強
|
鍾意就快D Share啦！
|
|
|
