黃宗澤（Bosco）在尖沙嘴投資7位數開設嘅餐廳，今日舉行開幕儀式，黃翠如、岑麗香、苗僑偉（三哥）、張繼聰等到賀，場面熱鬧，群星影大合照時，三哥搞笑說：「咁迫呀，呢度地方咁細，下次大啲地方先叫我啦。」而現場擺滿圈中人送嘅花籃，包括Bosco舊愛胡杏兒同老公Philip聯名送「開張大吉」花籃致賀。
翠如今日單拖現身賀Bosco，佢抵死話：「本來蕭正楠都嚟，不過佢o依家畀女圍，今日佢有船P活動，等佢開心吓，佢返嚟就冇命。」身邊嘅香香笑說：「唔會嘅，佢同你一齊好開心嘅，所以你唔使擔心。」講番Bosco間餐廳，翠如話成日都有落去舊舖食嘢，仲自爆：「一次都冇畀過錢，乜要畀錢咩？」香香話：「我都成日有去，因為係朋友，大家好熟，真心提出意見。自己都係冇乜畀錢，只係畀過一次錢，食好多次先畀錢。」問到有冇興趣學Bosco做生意？香香表示：「其實都有嘅，但想多啲時間先，又未諗到做乜。」
Bosco同杏兒分手6年，當年傳Bosco暗撻湖南乳牛柳岩，令杏兒怒斬8年情。對於舊愛送花籃祝賀，Bosco坦言：「係呀，杏兒好有心，有send message恭喜我，佢今日唔得閒嚟，始終要湊仔行唔開。」杏兒已經做咗人妻兼人母，而Bosco至今仍是王老五，最近就同陳嘉桓傳緋聞，之前陳嘉桓表示會嚟訂枱，Bosco表示：「係呀，佢之前有搵我訂枱，呢啲咪好朋友囉，呢啲咪畀錢嘅好朋友囉。」講到開新店做老闆，幾時搵番個老闆娘？Bosco話：「如果要搵老闆娘，就要佢享福，唔好同我一齊捱啦，不過未有耐住，工作為先。」
對於翠如話冇畀過錢食嘢，Bosco抵死說：「嘩，呢啲真係難聽過粗口，呢啲叫做我請客，唔係唔使畀錢，我間嘢要收錢嘅，真係難聽過粗口，佢呢啲咪就係又食又拎囉，佢噚晚仲send訊息畀我，話今日會低胸露背嚟，最後又同我講話唔記得借衫，所以冇囉！早知叫佢嚟我屋企啦，我搵都搵條裙畀佢着呀。」
至於三哥笑嫌店舖細，Bosco表示：「三哥咁高要求，唔係成萬呎、搞上市都唔好叫佢。」之前三哥表示想搵埋曾志偉同佢搞火鍋店，Bosco話：「三哥咁忙，呢頭講完就唔記得咗，都係講吓啫，唔係進軍全國連鎖12間以上都唔好搞佢，一間半間佢睇唔上眼。」問到三哥係咪想搞12間以上連鎖？Bosco話：「哎，如果係真，就唔好搞我，我呢啲小本經營，我唔夠膽，就算夾錢夾細份我都唔夠膽。其實話就話餐廳老闆，我只係大打雜，間餐廳有總經理有總廚，我負責裝修搞清潔，洗吓蠔殼。」
精選娛聞，喺晒《娛果》
http://fb.com/appledailyent
|
鍾意就快D Share啦！
|
|
|
