古天樂、張智霖（Chilam）、鄭嘉穎同鄧麗欣（Stephy）等前晚出席《L風暴》慶功宴。講到有報道話Stephy同男友邱勝翊（王子）喺車內纏綿，Stephy話︰「冇呀！當時應該係研究吓食乜嘢！」佢仲話︰「嗰陣我用手機睇緊有乜嘢好食，佢伸個頭埋嚟睇埋一份。」佢強調自己唔會同男友當街親熱︰「梗唔會！反而會保持距離。喺街唔想太纏綿，同埋習慣前後腳，公開咗唔代表可以高調拍拖，尤其喺香港，感覺好多人睇住。」
嘉穎認黑面最強
同場嘅嘉穎心情靚爆，問到佢老婆陳凱琳早前參與港姐活動，事後有冇談論黑面港姐工藤佑采，佢搞笑話︰「黑面黑得過我咩？我黑面最出名，睇心情，要黑就黑，如果你要玩性格，就要貫徹始終，唔好一時黑一時唔黑，不過要承受後果，因為一定有人話你。」
《L風暴》突破1千萬票房，Chilam話︰「感恩票房咁好，今次演員班底真係好似黃金時代嘅電視劇。」對於蕭定一巨額同佢續約，佢笑住話︰「係咪真㗎？其實我哋仲有一年約，我係開過啲條件，但未傾到價錢。」佢仲話早前出席城城囡囡生日會，靚靚揀咗份有心思嘅禮物︰「城城個女似邊個？我唔識分，因為仲細。」
撰文：馮仁昭
|
鍾意就快D Share啦！
|
|
|
