【爆相爆片】朱茵於12年為黃貫中（Paul）誕下寶貝女黃鶯，全力減少工作湊女，做跟得媽媽。朱茵近月就為將6歲生日的囡囡，入讀小學四出張羅，讀者Mary向本報「爆相爆片」，指前日朱茵母女二人現身將軍澳區一間直資小學面試。素顏的朱茵雖已46歲，但依然keep得靚靚，全神貫注照顧囡囡，黃鶯就淡淡定乖乖坐着看圖書，神情從容。
現年46歲的「性感女神」朱茵於12年與拍拖15年、前Beyond成員黃貫中（Paul）結婚，當時她已懷孕三個月，同年10月女兒黃鶯出世。黃鶯今個月就6歲，已屆報讀小學一年級之齡，前日就被本報讀者Mary透過「爆相爆片」，直擊母女二人在將軍澳區一間小學等待面試。
可愛又唔緊張
照片中，見朱茵與黃鶯與其他家長及小朋友一樣，正等候安排面試，二人排排坐，朱茵就幫囡囡拎書包仔，黃鶯就乖乖坐着看圖書，Mary表示：「呢間學校好多人鍾意，好多人去咗面試，嗰陣淨係見到佢哋兩母女排排坐喺度等，唔覺得佢哋好緊張喎，佢個女好乖又可愛，坐喺媽咪側邊喺度睇書，佢教女都教得好好。」
讀者還透露朱茵素顏示人，大讚她保養得宜：「我以前都係佢fans，𠵱家好少見佢，不過見到佢素顏keep得好好，而且仲冇乜架子。」如今，不少藝人都愛為子女揀傳統名牌小學或國際學校，朱茵所揀的學校是直資中小學一條龍服務，以英文教學，在區內口碑甚佳。
而越大越精靈的黃鶯，眼睛大大，五官似媽咪，朱茵與阿Paul一向錫女錫到燶，相當保護囡囡童年成長，甚少讓女兒曝光，就算在社交平台都甚少分享囡囡的正面相。但隨着黃鶯長大，朱茵與阿Paul都開始放寬。
女兒呷爸爸醋
早前阿Paul就帶同囡囡去了內地，接拍真人騷《想想辦法吧爸爸》，雖然節目播映時間一改再改，尚未知何時出街，但早前預告片已看到黃鶯十分醒目，上鏡一點都不怕羞，常露出甜美笑容，主持人問她知道父母的工作是甚麼時，她更搞笑地指阿Paul的職業是畫家，媽媽朱茵的工作就不知道，不少網友都留言好奇平時火爆性格的阿Paul如何湊女，阿Paul在鏡頭前更被「小情人」黃鶯收服，變得千依百順。
至於朱茵，早在黃鶯未夠一歲，就為紀念女兒成長，首次寫書出《6磅10安士》散文集，她將女兒放在首位，大大減少幕前工作，專心湊女，做跟得媽媽。而黃鶯也甚嗲朱茵，阿Paul就爆料女兒有時呷醋，笑他會搶走媽媽，也講過不要弟妹，笑言不喜歡BB。
採訪：唐心悠
|
鍾意就快D Share啦！
|
|
|
