2018年12月22日 星期六

【嘴仔鼻仔似自己】祖藍認老心急追仔 囡囡出世六日唔敢抱 __,王祖藍,

採訪、攝影:曹家誠
王祖藍同李亞男結婚3年,今年7月先宣佈造人成功,話咁快李亞男今日就宣佈愛女出世,喺Ig貼出囡囡Gabrielle嘅手仔相。相關新聞:【似慳啲啦Baby ...


王祖藍同李亞男結婚3年,今年7月先宣佈造人成功,話咁快李亞男今日就宣佈愛女出世,喺Ig貼出囡囡Gabrielle嘅手仔相。

相關新聞:【似慳啲啦Baby】李亞男晒囡囡手仔相 祖藍:個樣太似我…



祖藍同鍾舒漫等今日喺葵青為音樂劇演出,祖藍心情好靚,一嚟到就多謝在場記者,因為要準備音樂劇演出,全程輕聲養住把聲受訪,佢話:「其實囡囡喺今個月17號出嚟,依家已經返咗屋企。」佢透露太太係開刀生,因為要揀日子去就自己綵排:「唔好意思,因為舞台劇影響咗個女嘅生日。」



問到佢有冇陪入產房?佢話:「有,太太係半身麻醉,好好笑,醫生播住張學友《每天愛你多一些》,邊聽住歌邊開刀,感覺好似同平時做水晶甲冇咩分別,成個過程只係十零分鐘。」佢又話因為開刀關係,醫生都已經剪咗臍帶,佢只係象徵式剪一下。



祖藍話囡囡對眼好似太太,但仍然有啲問題,佢話:「弊傢伙,個鼻同個嘴有啲似我,但女大十八變,我會祈禱佢越大越似媽咪。」而呢幾日佢要做舞台劇,所以由外父外母照顧妻女。祖藍話呢幾日要綵排:「自己每日返到去,都趕到返去凌晨睇佢飲奶,係母乳餵哺。」



囡囡17日出世,直到今日祖藍先第一次抱女:「出咗世六日都唔敢抱,驚自己一抱就忍唔住喊,會傷到把聲。結果今日抱眼濕濕,同亞男約好咗,做完個舞台劇會好好地喊一場,出世重約7磅,肥嘟嘟好白淨。手腳好長,手指腳趾都好長。」記者話咁咪似太太,佢話:「你哋都擔心呢,我都好擔心呀。」



囡囡英文名叫Gabrielle,祖藍話係太太改,意思係天上嚟嘅天使,但中文名未諗到,但祖藍有方向:「我想同音樂劇有關,因為仲喺個肚,播流行曲冇反應,但播音樂劇就好大反應。」至於今日冬至要做騷,佢話到平安夜先得閒可以慶祝一下,之後會同太太去日本:「送一個坐月旅行俾太太,好多孕婦鍾意去日本,亞男冇食刺身成年,帶佢去大擦特擦。」



問到太太復原未?佢話:「太太都仲有啲痛,要食止痛藥,見到佢睇BB個開心樣,我就知冇揀錯老婆,一定係個好媽媽。」咁幾時再追多個仔?佢都好心急:「起碼要等半年,因為開刀復原要耐啲,我都想快啲,我都老喇。」



精選娛聞,喺晒《娛果》

http://fb.com/appledailyent



 王祖藍同李亞男今日分別貼咗呢張「一家三手」相,宣佈囡囡已經出世。 王祖藍同李亞男今日分別貼咗呢張「一家三手」相,宣佈囡囡已經出世。
 祖藍添女,今日心情大靚演出舞台劇。

祖藍添女,今日心情大靚演出舞台劇。
 祖藍話囡囡17號出世,但今日先試過抱女,之前幾日一直驚一抱就喊。

祖藍話囡囡17號出世,但今日先試過抱女,之前幾日一直驚一抱就喊。
 問到囡囡似邊個,佢就話弊傢伙,因為嘴同鼻都似自己。

問到囡囡似邊個,佢就話弊傢伙,因為嘴同鼻都似自己。
 今日係同鍾舒漫一齊演出。

今日係同鍾舒漫一齊演出。

鍾意就快D Share啦!