湯鎮業雖然喺2015年已經以自由身重返無綫，但至今都只係拍過《梟雄》，客串過《心理追兇 Mind Hunter》，所以觀眾對佢再拍大台劇其實無乜印象，直至而家主演嘅《荷里活有個大老千》播出，湯鎮業飾演嘅華探長文雄戲份重，年輕觀眾先問佢係乜水，年長觀眾更會驚訝：「乜佢肥咗咁多嘅？」
唔知湯鎮業係邊位？佢後生喺無綫拍劇嗰時好靚仔㗎，特別係飾演《天龍八部》段譽嗰陣，當年業界形容佢靚仔到「轟動全城」！唔知佢外型大變？唔出奇，畢竟佢1986年已經無喺TVB拍劇，就算打亞視工都只係1989至1997年間，其餘絕大部分時間都喺內地搵食。至於無綫五虎將嘅佢點解多年唔喺香港工作，相信唔少人都會將原因聯想至已故女星翁美玲身上。
翁美玲扮演《射雕英雄傳》嘅黃蓉，至今仍被譽為無人能及。不過，當年佢事業騰飛，年僅26芳華正茂之時，突然自尋短見香消玉殞。據1985年時報道指，翁美玲同男友湯鎮業戀情亮紅燈，男方傳出有第三者，女方亦與富家子鄒世龍傳緋聞。翁美玲受感情困擾，喺寓所開煤氣自殺身亡。事件造成大量矛頭指向湯鎮業，令佢背負罵名兼被觀眾抵制，受歡迎程度急速下跌，之後離開無綫轉戰台灣又加入亞視都無起色，並喺90年代末逐漸淡出演藝界，轉往內地從商。
湯鎮近年間中幫無綫拍劇，但無意多拍增產，因為佢話香港拍劇太辛苦，自己又貪食好難keep fit，所以都係留返俾型佬苗僑偉好啲。
來源 source: http://nextplus.nextmedia.com
|
鍾意就快D Share啦！
|
|
|
