蓋：你點睇𢱑撈同擦鞋？
戴：坦白講，呢兩個名詞對我嚟講都好陌生，我從來未𢱑過撈，亦都未擦過鞋，我唔識擦鞋，可能我上唔到位就係因為我唔識擦鞋，所以好難講到俾你聽。其實𢱑撈比擦鞋好，𢱑撈只係好表達你嘅意慾，例如話我鍾意拍戲、好鍾意唱歌，你俾機會我啦。咁樣其實好有效，因為對方會俾你感動到，天道酬勤，如果你好勤力去做一件事，你話一開始我唔計較酬勞，就有機會衝出去做；至於擦鞋我就真係唔識教人，我完全唔識擦鞋，從來無擦過鞋，無論對方係咩嘢人，我做自己嘅工作，如果擦鞋叻嘅可以教吓我。
蓋：因為咩原因，會真正離開TVB？
我身上賺，最好每次續約都唔加薪，可以嘅話，減少少就仲好，今年賺唔到錢嘅就想你減少少，反而你都唔志在，外邊大把資源，佢哋會有呢個想法。其實我走係有幾個原因，第一佢哋成日話我唔夠騷，叫我還騷，我話人喺度，又無人唔識我，如果你俾唔到工作我，呢個係你嘅問題，唔係我嘅問題，點解你會同我講，應該係我同你講喎，「我唔夠騷喎，你諗吓辦法」有一年仲好笑，佢話我唔夠騷，不過我哋有方法，嚟緊三個月都無糧出，要停薪，因為你要還騷，但係我可以同你講，之後三個月會有好多騷，會爆晒，然後夠抵銷你呢三個月嘅糧，不過遲三個月出糧，我可以向你擔保，佢咁樣同我講，我話只要你安排到咪得囉，但結果真係爆咗。
蓋：但做到嘔嘅？
戴：我覺得其實全部都係你控制，用唔用係你話事，你用又得，唔用又得，然後第二年又同我講，話我今年唔係好夠騷，不過我同你求咗情，咁你減少少騷錢啦。我話其實唔想再簽，佢話唔好啦，簽啦，只係減少少啫，我睇吓有冇辦法幫你爆騷，跟住又過咗一年。到下一年簽約又再講一次，我話算啦，大家都行到呢步，我都唔係好想再簽，反正自己外邊都好忙，好多生意，你哋嘅資源並唔足夠令我每一次都必定要接受你嘅要求，於是就離開咗，做番自己工作，感覺好舒服，因為拍劇都好辛苦，其實咁多年以嚟我都好怕捱夜。
蓋：但係你捱咗好多年？
戴：捱咗好多年，所以呢一刻想轉，其實八九年開始做地產，然後九九年有做一啲財務策劃，到一二、一三年左右就離開咗電視台。離開之後我覺得好舒服，因為過嘅生活似番一個人，其實過去日子太多工作，其實唔可以好好去渡假，想放假一、兩個星期真係好難，因為TVB唔可以放假，任何時間你話想放假都唔可以，會話你將會有騷，唔好放咁多，兩日就無問題，一個星期就唔得喎，你等一陣先啦。但到我離開電視台，過番自己嘅生活，一年中可以去兩個星期、三個星期，幾時去都得，任何時間去都得，去幾耐都得，係好舒服，去邊度都得，咁樣都係一個轉變。
蓋：覺得藝人身份會有幫助，定係更困難？
戴：其實所有嘢都係睇你嘅出發點，如果你嘅準備係充足同專業嘅話，係會有幫助嘅，但最緊要自己嘅出發點，就係要準備自己，唔可以不學無術，只係掛名，要真係去做呢件事。其實我考咗好多牌，我從事策劃工作，喺三年內考咗六個資格，喺香港校外進修讀書，考咗六個學科，咁樣對方就會信服你。
蓋：係因為自己有興趣，定係因為收入豐厚？
戴：其實前者係多啲嘅，因為當年做地產，九七年時大跌市，覺得自己前景好迷茫，然後就轉做財富策劃，因為自己之前喺各方面都有啲投資，覺得唔錯，於是的起心肝去做，因為無退路，一定要去做呢件事，結果好博命去做，呢世人都未試過咁勤力去讀書，三年讀咗六個學科，係好厲害，我都覺得自己好叻，但人就係咁樣，當你有需要就會去做，同埋自己都覺得幾適合做呢個工作。
蓋：有咩建議俾一啲仍然默默耕耘嘅藝人？
俾自己一個時限，呢段時間之內你可以投入去做，但大前提係你無乜經濟負擔，如果你有經濟負擔而去做嘅話，就要將時間縮短，因為好坦白講，而家做嘅唔係話你才能好，或者覺得自己樣樣都好，就可以成功，係需要天時地利人和，要有人脈，同埋背後有人支持你，究竟有冇人支持你？佢哋點解要支持你？要衡量呢方面。當然有才能嘅一樣可以發揮，但係你嘅才能去到邊一點呢？你嘅才能係咪一出嚟就爆炸性，或者每一次都令人驚喜、驚嘆？自己有冇俾心機去思考，同俾心機去做呢？我覺得時限好緊要，因為過咗黃金時間嘅話都會幾坎坷，我本身比較實際，我覺得資源好緊要，如果你控制得唔好，當你過咗黃金時間，可能會迷失喺唔夠資源嘅生活當中，因為你知道而家樣樣嘢都好貴，所以我都鼓勵若果你真係有志，係可以去做，不過要知道自己嘅潛能喺邊度，同埋實力去到邊度，同埋你有冇咁嘅能力花時間去等待。但我覺得而家有樣好，我見到一啲網上平台可以幫到你，如果你有啲特點，唔需要依靠一個機構，因為要一個機構去捧紅你，坦白講會有好多考慮因素，你未必係佢嗰杯茶，或者佢已經有好多杯茶喺度，背後有好多原因我哋唔清楚，你就可以利用呢啲平台去發揮，當你累積到一班觀眾、收視，就已經成功咗一大步，同埋資源就會返嚟，呢個都係一個方法，而家相比以前係比較幸運，以前無呢樣嘢，而家可以，尤其是如果可以打入國內平台，講緊嘅係十幾億人。
蓋：大家有冇留意，志偉哥講青春有限嘅時候，係望一望我？
戴：無～無～無。
蓋：我收到㗎喇，呢段說話我會無限
loop，聽多幾次，消化一下，其實我都有set時限俾自己，唔係話要有咩嘢成績，不過唔會無限地等。
戴：同埋你要知道係邊個掌握，因為我哋唔可以等運到，唔好期望平地一聲雷，咁樣係好困難，要真係創造一啲嘢去吸引人，同埋要自己主導，唔好俾人控制，我都話，如果你俾一個機構控制，機會係會好微。自己去創造，諗一啲嘢。
蓋：今日好多謝志偉哥哥嘅分享，我希望有一日可以同你同台一齊jam歌。
戴：我都希望。
【蓋世寶訪問你】參加第八期訓練班的蓋世寶Lulu，入行後被派去主持兒童節目，一做就做了18年。15年轉了去戲劇組的Lulu本來以為有新開始，可惜不擅擦鞋不懂搲撈的她怎搲都沒有用！Lulu離開工作了23年TVB，不定時為壹周刊主持「蓋世寶訪問你」，大家要留意呀！
攝錄：黃志明、蕭敬漁
策劃：肥A
主持人：蓋世寶
化妝及髮型：毛毛
來源 source: http://nextplus.nextmedia.com
|
鍾意就快D Share啦！
|
|
|
